KELING beguai ngendas kapur ba kening iya lalu berumban ngerasukka kulit Pelai Tekalong Begetah.

Diatu iya ukai Keling agi tang Sebungkok. Iya pansut lalu bejalai niti ruai sida Kumang. Enda lama udah nya, Kumang pen muka pintu nya.

“Eh…nuan nya Sebungkok?” pia ku Kumang nanya seraya tekenyit meda Sebungkok bisi ba ruai sida.

“Au…aku mih tu! Bejalai ari setak ili nyin lalu mansa ruai kita ditu.”

“Empelah aku Sebungkok, bisi meda orang mansa ditu nuan tadi?”

“Nadai aku meda sebarang orang mansa ditu, aku nadai meda orang bukai, ta kediri aku aja ditu,” ku Sebungkok nyaut.

Udah nya, Sebungkok lalu bejalai nuju panggau peninduk Ngelai. Ngelai agi engkuruh naka penginggar, jenak tinduk.

Sebungkok ngambi sekeda kapu lalu diunsut iya ba kening Ngelai.

Tembu ngunsut kapu nya, iya lalu ngali kediri ba sepiak Ngelai sereta ngaga diri bekuruh ga tudah tuai, inggar mimit ari enggi Ngelai.

Enda lama udah nya, Ngelai nyau tedani ninga kuruh Sebungkok. Iya pen angkat ensugau lalu ngerak tudah Sebungkok.

“Oo unggal! Dani unggal, udah tawas hari. Badu agi bekuruh!” pia ku Ngelai ngerak Sebungkok ti ngaga diri jenak tinduk.

Ninga Ngelai ngerak iya, Sebungkok ngaga diri dani, iya pen ngelulu diri angkat ensugau baka orang ke baru dani tinduk nya.

“Jenak amat aku tinduk demalam, unggal. Engka laban kelalu lelak kini,” ku saut Sebungkok.

Laban ke tinduk jenak amat, Ngelai enda nemu Sebungkok malam nya nemuai ngagai meligai peninduk Kumang din.

Tambah mega, Sebungkok sigi enda ngerak lalu minta ulu ke iya baka ba malam dulu ari nya.

Ngalih ngagai Kumang ti benung berapi tadi, iya pen udah tembu berapi pagi nya.

“Shin,” ku iya ngangau ke menyadi indu iya ti benama Lulong.

Laban seduai bela sayau ke pangan diri, nya alai, seduai bekangau ngena nama kangau aja. Kumang ngagau ke Lulong ngena nama ‘Shin’.

“Dini nuan, Shin? Aram mandi tua,” ku Kumang mai adi iya mandi.

“Au. Aram mih lalu nyauk tua lagi,” timbal Lulong.

Enda lama udah nya, seduai ngumpul lapan iti genuk dikena nyauk ai.

Lebuh seduai datai ba tiga takah pintu bilik ari bilik sida Kumang, dia seduai tepeda ke Ngelai enggau Sebungok duduk nyandih bekindu ba tisi pintu ruai semak bedilang.

Malik Kumang ngagai Ngelai peda iya bisi tanda burak ba kening Ngelai bekau unsut kapu.

‘Endai…nama kening Ngelai bisi bekau unsut kapu. Kati amat Ngelai datai nemuai ngagai aku dua malam bejurut?’

‘Apu…amat Ngelai mih nya peda kening iya bisi bekau unsut kapu aku demalam,’ ku Kumang bejaku kediri dalam ati.

“Oo…petunggal tuai,” ku Kumang enggau Lulong. “Nama pengawa nuan dia?”

“Benung bekindu ngena api bedilang tu,” ku saut Ngelai.

Kumang enggau Lulong ngengkahka genuk ke dibinching seduai lalu bejalai ngagai tengah ruai endur Sebungkok enggau Ngelai benung bekindu. Datai dia, seduai iya lalu duduk.

“Oh, petunggal tuai aku, Ngelai,” ku Kumang lalu nampung, “bisi bebida nuan diatu. Engka dunya tu udah berubah. Tu nadai kala nyadi sebedau tu.”

“Nama utai ku nuan nya?” tanya Ngelai ga enda mereti utai ti ku Kumang nya.

“Enda nemu,” ku saut Kumang sambil ketawa.

Lulong mega bela ketawa lebuh Kumang nusui pasal orang ke nadai dikelala nemuai ngagai iya dua malam bejurut.

Seduai bela ngeju enggau nyubit lengan pangan diri ketegal ngumbai Ngelai ngayap Kumang.

Kumang enggau Lulong alit ati meda Ngelai ti enda kala ngayap sapa-sapa sebedau tu tau datai ngayap Kumang. Kapu ba kening iya nyadi ke tanda.

Ngelai enda tentu nyamai asai lebuh Kumang madah munyi nya. Iya pen enda tentu deka nyadi duduk manah taja pen sida semina petunggal.

“Nama utai diketawa ke seduai?” tanya Ngelai agi enda mereti ke utai ti nyadi.

“Enda ibuh ngelalaika bulu landak dalam kandi enti duri landak nya panjai nyau bekechukak,” ku Kumang nimbal iya lalu nampung baru.

“Laban bulu landak nya tentu deka nebak tajam. Anang ngelamun ngena batang enti batang kayu belubang laban kapak deka melah.

“Anang ngelalaika abu laban abu deka tekebu dipuputka ribut.”

Malam nya, lebuh semua udah sengian ba rumah panjai Gelong, Sebungkok mansutka tungku ajih iya ti tau ngasuh orang tinduk jenak lalu ngeleda tedani bejalai nadai temu tuju.

Sebungkok lalu ngerak Ngelai. Pengudah puas ngumbuk iya, Ngelai pen setuju nyempulang Sebungkok nemuai ngagai Kumang malam nya.

Kira tengah malam, seduai pen datai ba pintu bilik sida Kumang.

Pintu nya sekali tu ditutup rat agi ari ke udah laban dirantai Gelayan ngena rantai besi ketegal iya balat ngeransi enggau ulah orang ke nemuai malam nyentuk iya tinduk merap genuk lembu.

Seduai nguji ngusak pintu ruai sida Kumang tang mih pintu nya enda nginsit mimit.

“Unggal,” ku Sebungkok, “uji nuan nulung ngambi duku aku ba atas pelasar semak panggau tua dikena aku ngetas rantai besi tu.”

Ninga siku nya ngasuh iya ngambi duku, Ngelai pen nurut aja lalu ngambi duku Sebungkok.

Lebuh iya kia baru pengudah ngambi duku, iya tepeda ke Sebungkok benung duduk ba mua pintu bilik sida Kumang.

“Tu iya,” pia ku Ngelai sambil nyuaka duku nya ngagai Sebungkok.

Udah nya, iya lalu belanda mulai kediri naka peneras laban iya pedis ati Sebungkok majak ngayap Kumang lalu iya takut ke Ngelai ngeransi.

‘Awak ke iya mati kediri,’ ku Ngelai bejaku dalam ati diri.