PADAWAN: Gerija St. Ann Kota Padawan nerima agih belanja Program Transfomasyen Menua Pesisir (RTP) tambah sepenyampau RM100,000 dikena nangkir entepan entukar ba gerija ungkup pengelantang pengusung enggau raban gerija.
Kaban Kunsil Nengeri (ADUN) Batu Kitang, Datuk Lo Khere Chiang madah, fasiliti nya beguna endar berindik ari entepan entukar ba gerija nya enda chukup kelebih agi maya besembiang enggau ngintu hari besai.
“Agih belanja tu deka dikena nangkir entepan entukar laban penyampau raban gerija ulih manggai beribu iku maya nurun besembiang enggau hari besai baka Krismas sereta Good Friday.
“Penyampau raban gerija ti datai maya misa Hari Minggu mega ulih manggai 2,000 iku lalu enti hari besai ulih matak entara 4,000 nyentuk 6,000 iku.
“Nya kebuah, agih belanja tu dikena nangkir entepan entukar dalam gerija ti diatu nyendia urung 94 entepan,” ku iya ba aum pemberita pengudah nyua replika chek RTP ngagai Gerija St. Ann Kota Padawan, ditu ensanus.
Ku iya, fasiliti nya ngenap inisiatif ti dulu nyengkaum agih belanja RTP RM200,000 ti diulih sebedau tu dikena ngaga entepan entukar ba belakang Sekula Sekondari Chung Hua ungkup dikena Gerija St. Ann.
“Naka diatu, bisi 94 entepan entukar dalam gerija udah tembu diadu lalu bisi lebih 200 entepan entukar ungkup gerija tu.
“Ungkup entepan entukar ba luar gerija, kitai agi beguna urung RM500,000 da lalu projek tu deka dipejalai nengah dua renggat
. “Sebedau tu, entepan entukar nya endang udah bisi tang enda chukup.
“Nengah belanja tambah RM100,000 tu, kitai ulih nangkir entepan entukar dalam Gerija St. Ann,” tandu iya.
Nambah ke nya, Khere Chiang meri terima kasih ngagai Unit Pekara Pengarap Bukai (UNIFOR) laban udah ngagih belanja ungkup pemansang Gerija St. Ann Kota Padawan nyengkaum ngaga begunan kelas Sekula Minggu.
“Begunan tu nyendia 14 kelas ungkup belajar sembiang seraya meri pemaik besai ngagai komuniti gerija.
“Tang, ungkup pengawa bekaul infrastruktur baka entepan entukar, tu udah nyadi tanggungpengawa pengari rayat dia nyaup nengah agih belanja baka RTP,” ku iya nyemetak.
Khere Chiang mega meri terima kasih ngagai Perintah Gempung Parti Sarawak (GPS) diiring Premier Datuk Patinggi Tan Sri Abang Johari Tun Openg laban nyendia agih belanja RTP ngagai pengari rayat ngambi bejalaika projek ti meri pemaik ngagai rayat.
“Gerija tu entara penerima agih belanja nya,” terang iya.
Kelimpah ari nya, Paderi Gerija St. Ann Kota Padawan, Reverend Father Friar Don Don Romero Ramerez nesau mensia mayuh sampal datai ngerichah Pengerami Gawai Dayak enggau Kaamatan ti deka diatur ba gerija nya kena 15 nyentuk 17 Mei tu.
“Gerija St Ann bisi 27 komuniti paroki ari genturung pendiau ngelingi Padawan lalu pengerami nya peluang ngerami bemacham budaya sereta nyempil kaul komuniti.
“Pengawa bejadi pengerami tu deka diatur kena 16 Mei belabuh ari pukul 8 pagi enggau misa sebedau ditampung nengah mayuh aktiviti ngerichah pengerami.
“Pengerami tu mandangka rumah panjai enggau mayuh pemerindang main asal, pemakai asal sereta richah digulu komuniti nyengkaum etnik Bidayuh, Iban, Melanau enggau ke bukai ti mandangka pengelain adat enggau main asal,” ku iya.
