BINTULU: Menteri Pemansang Indu, Nembiak Mit enggau Pengelantang Komuniti, Datuk Sri Fatimah Abdullah ngetuaika diligit Sarawak ngulu Kongres Asia Pasifik Gerempung Pelajar Tumu Nembiak Mit Sedunya (OMEP) Ke-12 ba Macquarie University, Sydney, Australia kena 6 nyentuk 8 Disember tu.

Sepenyampau 21 menua ari selampur dunya ngulu kongres nya enggau tuju ngetan enggau narak hak nembiak mit ti meri perati ngagai hak ba pelajar enggau ngibun mungkur serap menua.

Dikena nyapai tuju nya, OMEP deka nyukung sebarang pengawa ti mai pemansang ngagai akses pelajar enggau nyaga tumu nembiak mit ti bisi kualiti.

Ba hari keterubah kongres nya, Fatimah enggau bala diligit udah ngambi bagi ba program nemuai seraya belajar ke Palan Pelajar Nembiak Mit enggau Ruang Bilik Mia Mia.

Sida mega enggau pengawa rejister OMEP, nemuai seraya belajar ke Waratah Cottage sereta ngulu pengawa ngelancharka Kongres Asia Pasifik OMEP Ke-12.

Seraya ba hari kedua kongres, Fatimah udah mantaika keretads jurai diberi nama ‘Nyendia Akses, Ekuiti, Kualiti enggau Pelajar Tumu Nembiak Mit Inklusif ba Sarawak’.

Ungkup penerang, OMEP sebuah organisasyen antarabansa ti ukai dikuasa perintah lalu enda ngiga untung enggau Status Perundingan ba Gerempung Bansa Beserakup.

Ba pejalai sekali tu, Fatimah disempulang Sapit Menteri Indu enggau Pemansang Tumu Nembiak Mit Sarawak, Datuk Rosey Yunus Colliner Gohe, Sapit Sekretari KPWK, Salina Bujang, Tuai Unit Pemansang Tumu Nembiak Mit KPWK, Ayub Dahari, Menijar Besai SeDidik Sdn Bhd, Jason Kong, Presiden, Serakup Operator Tadika (AKO) Sarawak, dua pegawai KPWK enggau empat pengajar ari SeDidik Sarawak.