Gagit bulih perais, duit lenyau kena tipu

SIBU: Kelalu gagit ninga diri nyadi pemenang bulih perais nengah sebengkah aplikasyen e-wallet penyampau RM8,888 nengah WhatsApp, siku lelaki napi pengerugi RM17, 632 ketegal ditipu sindiket nipu, Hari Enam tu tadi.

Ketuai Polis Pelilih Sibu, ACP Stanley Jonathan Ringgit madah urung pukul 12.15 tengahari Hari Enam tu tadi, lelaki beumur 25 taun nya siku penengkebang pisin, nerima kangau madahka iya menang perais ari sebengkah aplikasyen e-wallet.

Ku iya, lelaki nya dipinta meri penerang baka akaun bank iya dipasuk ba link ti diberi ngagai iya.

“Lebuh lelaki nya udah ngisi pom ba link nya, iya madahka duit dalam akaun nya enda chukup enggau akaun iya meseti bisi duit RM1,000 enti iya dekaka perais nya tauka meri akaun bank bukai.

“Udah nya, iya dipinta meri kod TAC ti deka dianjung ngagai lumur telefon iya,” terang iya ngagai pemberita, ditu kemari.

Ku iya, urung pukul 2.10 lemai, lelaki nya nerima kangau madahka duit iya agi enda chukup laban bisi sangkut enggau chukai asil.

“Lelaki nya udah mindahka RM300 ngambi duit ba bank iya chukup RM1,000 enggau diasuh meri penerang akaun.

“Pengudah meresa, iya meda duit ba akaun nya udah kurang RM1,000 enggau dipadahka penyampau nya enda chukup ngujungka iya ngasuh menyadi iya ngisi penerang diri enggau akaun bank iya ba link ti diberi tadi,” terang iya silik agi.

Stanley madah, urung pukul 4.30 lemai, menyadi lelaki nya mega udah meresa akaun iya enggau tetemuka duit penyampau RM10,888 udah lenyau ba akaun iya empu.

“Lelaki nya empu udah meresa akaun bank enggau duit RM6,744 mega udah lenyau ari tiga akaun bank iya,” tandu iya.

Nya alai, Stanley madahka kes tu dipansik di baruh Seksyen 420 Kanun Keseksaan.