TATAU: Kasihnya Warisan dipenggi tim N58 Balingian dipadu ngempu gelar Raja Sungai ba Mini Regata Tatau 2023 serimbai Pengerami Tatau 2023.
Tim N58 Balingian nya ngalahka tim bukai baka tim Lembaga Kemajuan Bintulu (BDA), Waris Bujang Vaie, TLB Balingian dalam kategori Pekayuh 30 Lelaki Raja Sungai ngujungka iya mai pulai perais mata duit RM16,000 enggau trofi.
Perais nya udah disuaka Menteri ba Opis Premier Sarawak ke mega ADUN Kakus, Datuk John Sikie Tayai ngagai tuai tim, Ardyman Matan.
Cahaya Kekal, sebuah agi bot ti berejister di baruh Tim N58 Balingian semina tepantup ati bulih lumur dua enggau nerima mata duit RM5,000 sereta trofi.
Lumur tiga diempu tim Waris Bujang Vaie ti mai pulai perais mata duit RM3,000 enggau trofi.
Seraya Balingian Jati diempu TLB Balingian enggau BDA Bintang Terang Satu bela bulih lumur empat enggau lima.
