KUCHING: Nadai pansik madahka gelumbang radio (RF) ngasuh enda likun ngagai pengerai taja digaga dampih enggau genturung pendiau.

Ketuai Direktor Ejensi Nuklear Malaysia (MNA), Dr. Mohd Abd Wahab Yusof madah, RF semina gelumbang elektromagnet ti dipansutka telefon nyengkaum radio.

“Pangka mit nya bepanggai ngagai pengelaju gelumbang tang naka diatu, RF enda ngachau pengerai genturung pendiau dampih tiang telikomunikasyen ti bisi RF.

“Ba selampur Malaysia, kitai netapka gelumbang enda ngeluie 1,000 mikro watt sentimiter persegi tang chara nyukat ti dipejalaika kami kediatu enda lebih ari tikas nya,” ku iya.

Iya madah baka nya ba aum pemberita enggau Menijar Besai Kaunsil Multimedia Sarawak (SMA), Dr. Zaidi Razak pengudah nyain MoU ti dikemataka Kepala Menteri Datuk Amar Abang Johari Tun Openg ba Opis Kepala Menteri ditu, kemari.

Ku Abd Wahab, Sarawak nyadi menua kedua ngaga kerejasama enggau piak iya pengudah Melaka kena matau guna RF likun dikena ngagai mensia mayuh.

“Kitai mantu SMA ari sukut nyukat sereta meri penemu ngagai mensia mayuh enggau pekara betul ngena RF ba tiang telikomunikasyen di Sarawak.

“Penyaga enggau pematau begulai entara SMA enggau MNA iya nya enggau ngeluarka setipikit ti diengkah ba tiang telikomunikasyen,”ku iya nerang.

Iya madah, mensia mayuh ulih nemu tiang telikomunikasyen nya selamat tauka enda maya meresa ngena scan Kod QR.

“Pia mega, ngena Kod QR, mensia mayuh ulih meda tikas pengelikun, gambar enggau palan tiang telikomunikasyen ti diperesa madahka MNA udah ngaga pansik ba tapak nya.

“Gelumbang RF nya baka non-iron lalu nadai meri pangka bukai ngagai pengerai nyengkaum riman baka dituduh setengah piak,” ku iya.

Iya madah, MNA udah nyukat 40 tapak tiang telikomunikasyen di selampur Sarawak kenyau taun 2016.

Sama datai, Direktor Kanan MNA, Dr. Siti A’iasiah Hashim serta Menijar Non-ionising Radiation Group, Begian Pengelikun enggau Pengerai Radiasyen MNA, Roha Tukimin.