KUCHING: Sarawak manggaika pengulih fiskal Perintah Bsai bekaul langgur chara meri geran khas ngagai nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak nemu penanggul fiskal ke nyangka bisi ditapi perintah lalu enggai nanggul belanja menua.

“Tu tepulai ngagai pengulih Perintah Besai. Tang taja pia enti Perintah Besai ulih, nadai kebuah enda bekunsika asil enggau Sarawak.

“Tang enti bisi penanggul belanja, kitai mega nemu laban kitai enda amu.

“Enti enda ulih meri geran, nyangka tau meri bantu bukai baka insentif chukai ti ulih matak pemeranak puku enggau numbuh industri baru,” pia ku iya.

Iya bejaku munyi nya maya pengerami bejadi ‘New Horizons For Western Digital (WD) Sarawak di Zon Perindustrian Bebas Samalaju, Hari Empat tu tadi.

Iya mega madah, taja empai bisi randau nyemetak bekaul pekara nya, kelimpah kala disebut maya betemu enggau menteri besai di bintulu empai lama tu tadi, tang iya nimbal manah pengawa meri geran khas bepelasarka Pekara 112D Konstitusyen Perintah Besai.

Bekaul insentif chukai, ku iya, iya udah ngenataika langgur ngambika perintah besai nyendiaka insentif ngagai industri ti ngena energi ulih dikena baru nyengkaum kompeni teknologi moden dikena nyaup pengulih besemekih meranak puku gadung menua.

Premier Sarawak madah, insentif nya bela tau diberi dikena ngerumban pengulih ngena teknologi moden nyengkaum ngurangka chukai ba hidrogen enggau perengka pengangkut ti ngena hidrogen.

“Tang ba aku Perintah Besai tau meri insentif ngagai industri baru nyengkaum pengawa bekenaka hidrogen.

“Ambika banding, kompeni baka Western Digital ti ngasilka produk teknologi baru ngena energi ulih dikena baru patut diperunding nerima insentif nya.

“Lalu tu deka meransang penumbuh industri enggau nambah pengawa bekenaka energi ulih dikena baru,” ku iya nerang. -EDISI UKAS