Hari Bomba 2020 deka dirami chara online

KUCHING: Pengerami Hari Raban Bomba (SHAB) 2020 chukup besai reti laban betapi enggau pemar gawa kelebih agi chara baru, ku Khirudin Drahman.

Direktor Opis Bomba enggau Penyah Penusah Malaysia (JBPM) Sarawak nya madah, pengerami SHAB 2020 deka diintu bebida ari taun ke udah laban deka dirami ngena chara online pagila (4 Mei) deka mantaika jaku ari Ketuai Direktor JBPM Datuk Mohammad Hamdan Wahid nengah online ari Facebook JBPM Putrajaya.

“Pengerekai igi penyakit Covid-19 meri penanggul ngagai pengerami SHAB taun tu, taja pia kami deka nitihka Standar Atur Operasyen (SOP) Opis Menteri Pengerai (KKM) enggau Kaunsil Pengelikun Menua (MKN),” ku iya lebuh dirandau Suara Sarawak, tadi.

Nangkan nya ku iya, SHAB 2020 chukup besai reti laban pemar gawa chara baru diatu ke alai jauh nyelai ari chara biasa raban bomba gawa.

“SOP deka diteritka agi tang chara raban kami ke gawa enggau chakah meseti seruran ditan.

“Pemar tu meseti diasaika semua pemesai enggau raban bomba selampur menua kelebih agi di Sarawak ti ngembuan raban ti chukup mayuh,” ku iya.

Kelimpah ari nya ku iya, chara berunding enggau strategi ba pengawa ke digaga meseti berubah kelebih agi lebuh napi pemar ti baru diatu.

“Perintah Besai enggau Perintah Sarawak chukup ngemeratka tunga tuju JBPM Sarawak.

“Sukung ti kering ari komuniti enggau gerempung ukai dikuasa perintah (NGO) mai tuju enggau juluk JBPM chukup nyulut lalu kami Bomba Sarawak deka bepegai teguh ba prinsip Deliver The Best- Serve, Lead and Inspire,” ku iya.