KUCHING: Penatai Tuai Pemegai Menua (TYT) Nengeri Sarawak, Tun Pehin Sri Wan Junaidi Tuanku Jaafar enggau bini, Toh Puan Datuk Patinggi Fauziah Mohd Sanusi ba Pengerami Makai Lemai Begulai enggau Bala Tuai Sarawak serimbai Pengerami Hari Pengada TYT Ke-80 diambat penuh basa ditu, malam kemari.
Pengerami nya richah agi enggau penatai Premier Sarawak, Datuk Patinggi Tan Sri Abang Johari Tun Openg.
Sebedau pengerami makai lemai nya berengkah, Pegawai Pengarap Astana, Ustaz Syed Mohd Rusydi Wan Yusup dulu macha sampi dikena ngepun pengerami nya.
Pengudah tembu makai lemai, Tun Wan Junaidi enggau Toh Puan Fauziah diberi basa nyirap kek hari pengada TYT ke-80. Udah nya dientudi ke pengawa nyirap kek ngintu genap taun kesemilan Abang Johari nyadi Premier Sarawak.
Pia mega, Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah bela dirami malam nya serimbai hari pengada iya ke-69.
Bala temuai ti datai bela diperindang enggau video Dirgahayu TYT serimbai taun kedua Tun Wan Junaidi dichiri nyadi TYT Nengeri Sarawak.
Pengerami hari pengada Tun Wan Junaidi besai agi reti lebuh video khas ari Toh Puan Fauziah ungkup Tun Wan Junaidi bisi dipandang.
Nambah ke nya, Toh Puan Fauziah bela nyada pelandai khas ungkup Tun Wan Junaidi ngena pejuluk Di Hadapan Semua, Aku Memilih Namamu.
Dikena ngujungka pengerami, Tun Wan Junaidi begambar ungkup kenang enggau bala temuai dipebasa sereta bala bukai.
Bela datai, dua Sapit Premier Sarawak, Datuk Amar Douglas Uggah Embas enggau Datuk Amar Dr. Sim Kui Hian, Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar, Sekretari Perintah Sarawak, Datuk Amar Mohamad Abu Bakar Marzuki, bala menteri, sapit menteri enggau temuai dipebasa bukai. – JAPEN
