Helbert Chiu

DI siti ruang kreatif di Jalan Stephen Yong, tebah gitar, buah runding enggau jeluk mujur digempung lebuh seraban pemekuh muzik menua tu numbuhka Music Shop.

Nya siti kelai pemerani nguji pekara baru ti sebedau tu semina dikumbai ‘enda ulih nyadi’ ba dunya muzik ngagai kediri Sarawak.

Inisiatif kerejasama entara Cincai Pedal Sarawak, CatSound enggau Studio Purrfect nya ngempung pengawa ngaga enggau nyeruri kereban muzik sereta ruang studio kreatif ba baruh siti perabung.

Nya ngangkatka Music Shop nyadi palan sekali ngetu ungkup bala pemuzik meli, nyual, nyeruri sereta nempa rentayan komuniti.

NGAGA PENGELAIN

Music Shop tu iya nya Helbert Chiu Hock How, 31, pemungkal Cincai Pedal Sarawak ti mega penengkebang kedai pedal gitar keterubah di nengeri tu.

“Ba kami sebuat, tu mih produk lokal ti keterubah sereta chukup besai reti ba komuniti Sarawak laban pengawa numbuh chap tu sebedau tu dikumbai enda ulih nyadi,” ku iya.

Helbert bejaku munyi nya lebuh dikerandau Suara Sarawak lebuh nglanchar Music Shop asil kerejasama Cincai Pedal Sarawak, CatSound enggau Studio Purrfect.

Terang iya, buah runding ngasilka pedal gitar tu berengkah kenyau taun 2022 lebuh iya nguji nempa bunyi gitar ti chukup bebida ungkup kereban muzik iya empu.

“Aku deka ngasilka bunyi lebuh orang nanya, sida deka nanya, ‘Nama bunyi nya?’

“Pengudah berapa bulan mansik skema enggau atur litar, aku mujur tetemu ke bunyi ti digiga, ti ulih diasil nengah litar preamp ti digaga baka gaya standard pedal.

“Tang maya nya, aku ngasai ke nadai chap pedal baka tu ba Sarawak lalu nya kebuah aku ngaga pemutus deka ngemansang satu chap kediri empu ba menua tu,” ku iya. Inisiatif nya, ku iya, ukai semina pemujur iya kediri aja tang nyadi kelai pengulih anak Sarawak ngasil produk ti berkualiti sereta ulih bersaing enggau chap ari menua luar.

“Tu ukai utai ti semina ulih digaga orang ari menua Barat tauka China aja.

“Kitai orang Malaysia lebih agi Sarawak pen ulih ngaga kereban tu,” ku tambah iya.

IDENTITI LOKAL

Pekara ti narit ati, identiti Sarawak nyata dipandang nengah produk nya lebuh pedal nya diberi nama Nasi Lemak, Kaca Chelum enggau Medium Belacan.

“Pedal keterubah iya nya Nasi Lemak ti dikena ngaluska bunyi gitar.

“Bunyi ti dipelanjaika deka nyadi tebal enggau lunak agi didinga, nya alai, aku rindu deka ke asil kereja jari lokal tu majak diangkat,” ku iya.

Iya mega madah, lebih agi nama pedal nya diambil ari ciri bunyi enggau gaya visual kelimpah ngempung elemen ti ngerindu ka ati, budaya enggau identiti menua tu ba genap pedal gitar.

Bebida enggau pedal komersial ti digaga ngena mesin, ku Helbert, genap produk Cincai Pedal digaga ngena jari sereta seruran dikemaskini agi pengudah dilanchar.

“Pedal komersial udah manggai ba tikas maksimum ba pengawa ngeluarka produk tang kami seruran ngemaya sereta ngubah nitih ke respons ari komuniti muzik menua tu,” ku iya. Iya mega madah, pengawa ngatur bunyi ton nya nyadi tampar ari identiti siku pemuzik.

“Pengawa neleba kediri enggau kereban muzik nya mantu pemuzik mandangka personaliti sida empu,” terang iya.

PENGUJI

Pengawa ngemansang Cincai Pedal ukai pekara ti mudah laban Helbert madah, proses nya penuh enggau penguji.

Iya berengkah ari pengawa ngasilka prototaip sebedau projek nya terhenti ketegal sibuk enggau pengawa diri. Tang ba taun 2024, iya ngaga pemutus besai ninggalka pengawa tetap ngambika ulih meri tumpuan penuh ngagai pengawa ngemansang Cincai Pedal.

Nya siti inisiatif ti besai reti ba iya ngambika ulih meri tumpuan enggau serius agi ngemansang pengawa nya.

Pia mega, Helbert ngaku kurang pengetahuan enggau tikas penemu ti agi mit ba raban pemuzik baru nyadi penguji besai dikena ngemansang jenama perengka muzik tempatan ba Sarawak.

“Bisi sekeda apin nemu istilah ti disebut pedal tauka bunyi ti diguna sida.

“Nya alai, guna belajar sereta aksesibiliti ba raban pemuzik baru enggau biak nyadi tuju besai Music Shop,” ku iya.

JULUK DUDI HARI

Tambah Helbert, juluk timpuh panjang iya nya deka meda Cincai Pedal ngagai Sarawak ba peringkat antarabangsa nyengkaum nengah pelasar baka Gerempung Nasional Pedagang Muzik sereta pameran serantau ti besai agi.

“Aku deka Cincai Pedal nandangkan tikas pengulih anak Sarawak.

“Nya alai, sekeda pekara besai bisi dipejalaika dikena ngeringka agi pugu lokal nengah Music Shop ti dibuka ungkup orang baru ti ngiga instrumen keterubah sida.

“Kelimpah ari nya, sida ti rindu ke muzik ti deka ngasilka agi bunyi gitar sereta bala pemekuh muzik ti bisi penelaba tang rindu deka ngiga chara ti berkualiti sereta mampu diempu ungkup perengka muzik sida mega diperansang datai ditu,” ku iya.

Nya mih tuju Music Shop ditumbuh iya nya dikena meri awak ngagai bala pemuzik ngulihka kereban muzik ti berkualiti enggau mampu diempu.

Pia mega, kedai nya nyedia servis ti berkualiti sereta ulih dikarap bala pemuzik di menua tu sekalika nya pemuzik baru tauka sida ti udah mayuh penelaba.

Laban ti nyadi kedai keterubah ba Kuching ti meri tumpuan ngagai instrumen muzik tempatan, Music Shop nyadi pelasar ti sesuai ungkup pengawa nyual mayuh gitar, bass, pedal enggau amplifier kelimpah meri peluang ngagai pemuzik nguji perengka nya sebedau ngaga pemutus meli.

Genap instrumen enggau aksesori deka diperesa sereta diuji nentuka kualiti kereban muzik nya.

MAYUH SERVIS

Kelimpah nyual, Music Shop mega bisi nyedia servis nyeruri penuh, nyeruri bunyi enggau intonasi, ngemanah elektronik, ngemas fret sereta ngemanah perengka bukai.

Baka ti suah disebut raban sida, ‘nadai gitar ti jai, semina ti enda dikesan’

Ba Studio Purrfect, inisiatif tu nyadi sebagai ari ekosistem kreatif ti besai agi nyengkaum fasiliti belatih, nglanchar langsung sereta ruang ngatur program ti ulih nampung nyentuk 80 orang.

Studio nya dibuka nyadi hab kreatif ti ukai ngiga untung tang benung ngemansang projek baka podcast Purrfect Que kelimpah masang juluk nyadi palan penyampai raban pemuzik enggau artis ba nengeri tu.

Integrasi tu ngasuh pemuzik lancar ngalih ari pengawa nyeruri tauka meli kereban muzik ngagai latih, ngerakod enggau ngatur program ba endur sebaka.