JULAU: Projek Nyeruri Perengkaguna Dagang Temuai di Homestay Rumah Magretta, Kerangan Buloh, Julau ti nerima agih belanja ari Opis Menteri Dagang Temuai, Seni enggau Budaya (MOTAC) udah tembu.
Kaban Kunsil Nengeri (ADUN) Meluan, Dato Rolland Duat Jubin madah, projek nya ukai semina ngemanah perengkaguna ti udah bisi, tang mandangka komuniti dia ransing negap sektor dagang temuai bepelasarka komuniti.
“Projek tu mandangka semangat kerejasama, pengeran enggau pengeransing peranak Rumah Magretta nyagu budaya lokal kelimpah ngulihka ekonomi nengah program ‘homestay’,” ku iya.
Iya nyebut pekara nya lebuh ngatur pejalai ngabas projek tembu Nyeruri Perengkaguna Dagang Temuai di Homestay Rumah Magretta, Kerangan Buloh, kena Hari Dua.
Dato Rolland mega meri tabi puji enggau pengaga ati ngagai peranak dia ti udah ngemujurka program rumah temuai nya sereta ngarap ke pengawa manah nya terus ngerembai enggau nyadi teladan ngagai komuniti bukai.
Kelimpah ari nya, Dato Rolland bisi limpang ngagai Rumah Kennedy, Rantau Jempai di Ulu Kanowit ngesah penusah rabat enggau meri basa kepenudi ngagai niang Sarjan (B) Jeffery Thomas ti midang kena 2 Januari tu tadi.
Iya mega meri penyinu ati ngagai sida niang sebilik lalu besampika sida terus liat ati napi penguji besai nya.-EDISI UKAS
