KUCHING: Pengerekai igi penyakit rabies agi nyadi penanggul pengerai mensia mayuh ti signifikan di Sarawak.
Menteri Industri Pemakai, Komoditi enggau Pemansang Wilayah Sarawak, Datuk Seri Dr Stephen Rundi Utom madah, sekumbang penyakit nya berengkah ditemu nyadi ba taun 2017 suba, menua bisi ngeripot 81 iku kena rampit rabies lalu ngujungka 74 iku midang.
“Ba taun 2024 aja, bisi enam kes baru udah nyadi di Sarawak.
“Ungkup penerang, ba renggat dunya, penyakit rabies ngujungka lebih ari 59,000 iku bebadi nyawa ninting taun, ke alai sida ti midang nya tebal agi dirikod di Asia enggau Afrika,” ku iya.
Teks jaku Dr Rundi nya dibacha Direktor Opis Servis Veterinar Sarawak, Datuk Dr Susin Ambud rambau ngintu Hari Rabies Sedunya ba Balai Kampung Semeba Kuching ditu, ensanus.
Ku iya, statistik nya nyadi pesan ti nyengala madahka rayat meseti meri perati lalu lengkas nyaga komuniti enggau orang ti dikesayau.
“Siti ari chara pemadu efektif ti patut dikena kitai munas igi penyakit rabies iya nya meri vaksin ukui bebala mayuh.
“Pengawa meri vaksin ukui tu ukai semina dikena nyaga ukui kitai tang mega nyadi singkang ti beguna dikena nyaga pengerai mensia mayuh.
“Kebuah pia laban ukui ti keterubah ngaul igi penyakit rabies di nengeri kitai, nya alai, kitai patut nentu sida diberi vaksin ti patut dikena munas igi penyakit tu ngerampit mensia mayuh,” ku iya.
