SERIAN: Niat siku apai tuai nimbak tuai bekalih nyadi penusah lebuh seterum senapang iya kena siku indu nyentuk tudah bebadi nyawa ba Kampung Engkeroh Mawang, Tebekang, ditu, Hari Tiga tu tadi.
Ba penusah urung pukul 9 pagi nya, tudah ti beumur 52 taun ditimbak lebuh ba kebun sayur iya, dipelaba enda ditemu saspek ti beumur 89 taun.
Tuai Polis Daerah Serian, Superintenden Freddy Bian madah, pansik tumu tetemuka saspek ngumbai bisi tupai ba kebun nya sebedau nyelabuka senapang.
“Tang nadai nasip, seterum nya tekenaka tudah ti enda jauh ari endur apai tuai nya nimbak.
Tudah indu nya dituku bebadi nyawa dia tekala nya,” ku Freddy lebuh dirandau, kemari.
Ku iya, saspek diatu ditan lalu deka direman ungkup pansik silik nitih Seksyen 302 Kanun Keseksaan ketegal munuh.
Iya nerang baru, senapang ti dikena bisi lisin, tang nama anak saspek.
“Lisin nya sebedau tu direjister nama saspek empu tang dikalih ngagai anak iya ba taun 2012.
“Kitai mega benung mansik ari sukut ngempu senyata api lalu baka ni agi diibun saspek,” ku iya.
Berindik ari nya, polis ngelalau mensia mayuh bejimat enggau ngasi ke undang-undang bekaul pengawa bekenaka senyata api dikena nyeliahka penusah sebaka nyadi baru. —SYAMIMI HUSNA
