Indu ke maya hari meseti berani berubah

DR Sharifah Shukran tauka tampak agi dikangau Anna Sue ba dunya fesyen, fokus mantu raban indu ba industri bedagang.

Anna Sue tu ngembuan pelajar tinggi PhD Bussiness Administration suah ngiring raban indu nengah latih pengelandik enggau licha ngambi nyadi pedagang di menua tu.

Anna Sue pechaya, raban indu diberi pengelebih ngambi ngubah pengidup diri enggau ulih ngaul diri ba pekara rama, politik enggau ekonomi.

Iya mega pechayaka raban indu kemaya hari ngembuan pengelandik enda ngira sekalika landik ba pengawa bedagang enggau ngasilka krafjari.

“Raban indu diperansang ngerembaika pengelebih diri ngambika sida ulih ngangkatka diri, meri penemu ngagai orang bukai sereta berubah nitihka penau dikembuan sida,” ku Anna Sue nyemetak madah.

MANTU ORANG INDU… Anna Sue diatu chakah mantu orang indu ngambi ulih nyungkak pengidup sida.

Anna Sue mega madahka diri ngaul diri ba pengawa dagang tu kenyau ari taun 2009 ba industri pisin.

Pia mega, iya madahka raban indu ti ngulu pengawa dagang majak mayuh beduduk ari ubah pemansang nengah e-dagang.

“Diatu, raban indu suah dipeda kitai mangku pengawa besai ba mayuh bidang laban indu diatu mega ngembuan pelajar tinggi.

“Nambahka nya, raban indu mega bepenemu enggau ulih gawa sebaka enggau orang lelaki.

“Tebal agi, raban indu diatu mayuh udah gawa enggau ulih ngiga belanja diri,” ku Anna Sue nerang.

TAMPAK RITA… Nama Anna Sue majak dikelala kelebih agi ba industri pisin.

Ba penemu iya, raban indu meseti ngambi bagi ba semua sektor ekonomi di menua tu.

“Kebuah pia laban pekara tu ulih nyungkak pemansang ekonomi, ngubah pengidup diri, ruang bilik enggau komuniti,” terang iya.

Berebak enggau nya, Anna Sue mega madah sentang kebuah raban indu meseti ngaul diri ba industri dagang.

NGUBAH PENGIDUP DIRI

Dunya kitai diatu majak berubah enggau raban indu enda ngereja pengawa lama baka diau ba rumah aja.

Nya alai, Anna sue madahka raban indu meseti diberi peluang ngemansangka diri ba mayuh bidang baka pengawa dagang.

Nambahka nya ku, raban indu ti bepenemu enggau bepenau meseti diberi peluang ngatika diri.

Ku iya, pekara tu beguna amat nentuka sida besedia napi sebarang penanggul tauka penguji.

Nya kebuah raban indu meseti ngerebut peluang ba mayuh bidang ngambi ulih nambahka penatai pemisi enggau ngubah tikas idup sida.

Nama Anna Sue majak pegari nama di menua tu kelebih agi ba industri pisin pengudah iya ngatur bemacham program ngaul raban indu kelimpah ngembing sida ngemansangka pengidup.

“Raban indu endang diperansang gawa nambahka penatai pemisi sida sebilik beduduk ari tikas idup makin tinggi diatu.

“Nya alai, indu enggau lelaki meseti sama gawa ngiga belanja ngambi nyendiaka pengidup menyana enggau bala anak dianjung besekula dataika tikas tinggi,” terang iya.

JAKU PERANSANG… Anna Sue keran ngembing pedagang di menua tu ngambi sama mujur enggau ngubah pengidup diri.

Pengidup ke menyana agi ulih ngubah gaya idup kitai kelimpah nagang penanggul rama nyadi.

LANDIK

Terang iya, bisi sekeda enda ulih mujur dipejalai enti nadai indu laban indu tu ngembuan ulah ti mentas.
Entara bidang tu baka ba gerempung ukai dikuasa perintah (NGO), bidang pelajar tumu anak mit, nyadi indu misi, ngaga asil pengelandik jari, nganta enggau pengawa bukai.

Berindik ari nya ku iya, raban indu meseti ngemansangka diri ngambi ngubah dunya enggau ngubah peragam bekaul pengelebih indu.

Ngelansa pasal utai ke kala diasai sekumbang nyadi pedagang, Anna madahka raban indu kemaya hari ngembuan peluang besai ngaul diri ba pengawa dagang.

Peratus raban indu ti nyadi pedagang majak nambah berapa taun ke udah.

Sebedau mujur baka ti ditemu kitai diatu, Anna empu kala numbuhka palan tuisyen enggau kedai bunga.

NYULUT… Dagang Anna Sue makin tebilang lebuh iya mantaika pisin nitihka gaya moden kemaya hari.

Taja pia ku iya, ketegal dagang ti berubah ngena arus penyambung ba taun 2012, ngujungka kededua dagang iya ditutup lalu ngepunka pengawa nyual asil pengelandik jari ari rumah.

Dagang mit ari rumah iya makin mujur ngujungka diatu iya siku ari pedagang indu ti chakah ngaul diri ba dunya pisin.

Berindik ari pengelandik enggau penyulut dijapai iya berapa taun ke udah, iya udah menggi Anugerah Penengkebang Pisin Sarawak Pemadu Manah 2019 enggau siku ari finalis Anugerah Usahawan Bumiputera Sarawak.

Kelimpah ari ngembuan PhD Business Administration, Anna mega siku penengkebang pisin ti tebilang ba menua tu enggau menggi Anugerah Penengkebang Pisin Sarawak Pemadu Manah 2019.

RESIA

Nitihka peneleba dikembuan iya, Anna bisi bekunsika sekeda pekara pemadu beguna ungkup raban indu ti bisi ati ngaul diri ba pengawa dagang.

Keterubah, beratika pemujur pedagang bukai enggau ngembuan pengingin ati deka mujur baka orang bukai.
Anna mega madah, bekunsika pejalai enggau peneleba ba dunya pisin tu entara chara pemadu ngasi ngubah runding bala bukai.

Chara tu mega ulih meransang bala bukai ngubah enggau ngemansangka pengelandik dikembuan sida.
Kedua, nambahka pengelebih diri ari sukut pelajar, penemu enggau pengelandik.

Ba pekara tu ku iya, kitai enda tau enda bagas nyereta kus tauka betanya ngagai orang bukai ti bisi penau pasal pekara ti deka ditemu kitai enggau anang malu betanya.

Ketiga, tiang sukung. Lebuh ngepunka dagang, kitai meseti ngembing komuniti kelebih agi raban diselinting ngambi sama mantu ngerembaika dagang.

Kelimpah ari nya, kitai meseti bekerejasama enggau gerempung ukai dikuasa perintah (NGO), ejensi perintah enggau gerempung pedagang.

Anna madah, chara kepenudi enggau utai pemadu beguna lebuh mansang ke mua iya nya pechayaka pengelebih dikembuan diri ngambi kitai ulih nyapai pemujur enggau utai dikedeka ngelama tu.

Suara Sarawak