BINTULU: Perintah Sarawak deka meri perati ngagai pengawa nyeleti infrastruktur mensia mayuh enggau bekal ai beresi ti rusak ketegal penusah bah ti nuntung sekeda endur di nengeri tu.
Premier Sarawak, Datuk Patinggi Tan Sri Abang Johari Tun Openg madah, inisiatif nya ngaul jalai alun, sistem parit enggau bekal utiliti ti putus dikena nentu aktiviti ninting hari rayat lanchar.
“Bekal ai beresi ti putus tu deka diseleti lengkas dikena nyeliah empas negatif,” ku iya. Abang Johari mansutka jaku nya rambau ngaul raban tasah bah di Palan Ngenduh (PPS) Balai Suarah Bintulu ditu, kemari. Iya nyemetak madah, sukut pengerai rayat diberi perati lalu raban opis pengerai digerah matau enggau mutar sebarang pengerekai igi penyakit berebak ai penusah bah.
“Penusah bah sekali tu raya agi ari ngelama tu sereta enda disadang, tu ukai semina nuntung Bintulu aja tang bela nuntung Miri, Baram, Limbang, Kuching, Serian enggau Gedong.
“Pekara tu bepun ari ubah klimet ti ngujungka gaya hari enda tentu,” terang iya.
Tampung iya, Perintah Sarawak udah meri agih belanja RM10 juta ngagai Sekretariat Komiti Penyangga Penusah Nengeri Sarawak dikena mantu genturung ti ampuh sereta deka nambah agih belanja nya nitih pematut bepelasarka audit pengerusak ti benung dipejalai.
“Aku ngarap ujan tu ngetu lalu pulai baka selama baka ti dipelaba Opis Pengemata Gaya Hari Malaysia (METMalaysia),” ku iya.
Nangkan nya, Abang Johari muji penyiru raban peribit ti bela meri bantu ngagai raban tasah bah nyengkaum Gerempung Pemansang Pengawa Berumah enggau Reta Tanah Sarawak (SHEDA) Bintulu ti meri agih belanja RM600,000 lalu sebuah agi serikat di Miri meri agih belanja RM300,000. Pia mega, iya beterima kasih ngagai Polis DiRaja Malaysia (PDRM), Opis Bomba enggau Penyah Penusah Malaysia (JBPM), Raban Penyangga Orang Periman Malaysia (APM) sereta raban bekuasa lokal ti udah bebendar bejalaika pangku pengawa sida napi penusah bah.
Iya ngelalau komuniti terus besampi ngambi penusah nya lengkas pulai baka selama sereta beterima kasih ngagai pengari rayat ti udah ngabas raban tasah bah.
Dulu ari nya, Abang Johari bisi ngulu licha bekaul penusah bah di bagi menua Bintulu ti dikunsika Chairman Komiti Penyangga Penusah Ngenyit Bagi Menua Bintulu ti mega Residen Bagi Menua Bintulu, Datuk Nyurak Keti.
