Jaga pemeresi, guna sengkabung mua

KUCHING: Rayat mayuh bela dilalalu ngambika nyaga pemeresi diri sereta bekenaka sengkabung mua sereta anang ngusung palan ke mayuh orang.

Kepala Menteri Datuk Patinggi Abang Johari Tun Openg madah perintah nengeri deka neritka atur tama ke nengeri tu ungkup bala temuai ari menua luar kelebih agi ari menua China nengah padang bilun ba nengeri tu berindik ari kes koronavirus.

Iya madahka Perintah Sarawak sigi bebendar dalam nagang penyakit nya ngerekai ke nengeri tu.

“Taja temuai ari China ngagai Sarawak dirikodka enda mayuh, tang utai ke dikeirauka aku iya nya sida ke datai ari Sabah.

“Sida ulih tama kitu nengah Kompleks Imigresen, Kastam, Kuarantin enggau Pengelikun (ICQS) Sungai Tujuh di Miri,” ku iya.

Abang Johari madah munyi nya ba aum pemberita beserimbai enggau Program Jum Berambeh Makai Rian ba luar Surau Darul Qarar, Kampung Temedak ditu, pagi tadi.

Nangkan nya ku iya, dalam nagang penyakit tu, Perintah Sarawak neritka atur tama ari Miri kelai bejejaga.

Kelimpah ari nya lebuh dirandau pemberita bekaul enggau nagang penama temuai ari menua China ke Malaysia, Abang Johari madahka iya enda ulih meri timbal panjai bekaul enggau pekara nya.

“Pekara tu bepanggai ngagai menteri Perintah Besai lalu aku enggai meri timbal pasal polisi menua,” ku iya.

Suara Sarawak