JAKU TESAU! Sapa udah ngusung rumah panjai ba Sungai Liam enggau Bakong dipinta lengkas beperesa pengerai

KAPIT: Opis Pengerai Bagi Menua (PKB) Kapit nesau barang sapa peranak Kapit kala ngusung sekeda rumah panjai ba Sungai Liam enggau Bakong patut jampat beperesa Covid-19.
Pengari PKP Kapit udah mansutka jaku tesau nya beduduk ari kes positif Covid- 19 bisi ditemu nyadi ba sekeda rumah panjai ba menua nya.
Ku iya, entara rumah panjai tu iya nya Rumah Emah, Sungai Liam, Miri, Rumah Apol (Sungai Liam, Miri), Rumah Chabu (Bakong, Miri), Rumah Anthony (Bakong, Miri) enggau Rumah Justine (Bakong, Miri).
“Barang sapa kala ngusung rumah panjai nya berengkah ari 1 Disember nyentuk 17 Januari tu, patut datai beperesa Covid-19 enggau lengkas,” ku iya.
Sida ulih betelefon nuju Unit Penyaga Penyakit (CDC) Opis Pengerai Pelilih Daerah (PKD) bala ke dirintai tu ; PKD Kapit ngena lumur 084-799264, PKD Song (084-777833), PKD Belaga (086-461128).
“Pia mega sida tau datai terus ngagai sebarang palan beperesa Covid-19 ke pemadu semak baka Klinik Pengerai Kapit, Klinik Pengerai Song, Klinik Pengerai Belaga enggau Klinik Pengerai Sungai Asap,” ku iya.