LIMBANG: Jalai alternatif ti diperambu ari Miri ke Limbang nengah Long Lama, Marudi enggau Bario ti enda mansa Brunei udah dipesetuju Menteri Besai Tun Dr Mahathir Mohamad.

Tebal agi komuniti di Limbang lebuh dirandau Suara Sarawak setujuka perambu nya.

Kenu ku penemu Nur Farahin Pangis, 22 taun, penyekut jalai di garis entara menua deka teputar laban jalai alternatif ti diperambu enda mansa menua Brunei.

“Panjai rintai sereta nyau manggai bejam pengelama maya berintai di garis entara menua lalu tu masau jam kami ti mindah.

“Bisi sekali aku berintai dia nyauka empat jam pengelama,” ku iya mantaika sebana diri.

Seraya Noratikah Ainul Ariffin, 20 taun, madahka diri badu agi kiruh ngemai passport lebuh mindah ari Limbang.

“Tu deka ngemuntangka peranak Limbang kelebih agi sida ti ditagang mindah ke Miri tauka Sabah ketegal enda mayar PTPTN.

“Kebuah pia laban Pelilih Limbang tu ba tengah menua Brunei Darussalam,” ku Noratikah.

Nur Qurratu’Aini Sallehuddin, 28 taun, madah, sida ti diau enggau bekereja di Limbang mega badu agi nangi sereta irauka diri disaman piak bekuasa Brunei enti ngelekat cheremin chelum.

“Taja menua Malaysia ngemendarka rayat ngelekat cheremin chelum nitihka atur baru, tang menua sepiak enda ngemendarka iya.

“Saman mega chukup mar sereta nating sida ti disaman, 50 dolar tauka RM150,” ku iya nerang.

Ku Silvester Roy, 27 taun, sambung jalai alternatif tu meri peluang dagang ngagai peranak Limbang.

“Barang baka manuk, berau enggau utai bukai deka ulih enggau muntang agi dibai tama laban polisi menua Brunei diatu nagang barang bansa tu dibai tama ke menua nya.

“Rega barang di Limbang mega ulih dikurang tauka dijual mudah agi ila enti sambung jalai udah tembu digaga,” ku Silvester andal.

Menteri Kereja Raya Malaysia Baru Bian madahka jalai alternatif nya deka digaga ngerenchah Long Lama, Marudi, Bario terus ke Limbang enggau Lawas lalu enda ibuh mansa menua Brunei.