MIRI: Pemerani Koperal Pinchin Etim Jam ngelaban komunis kena 29 April 1972 meruan dikenang ba turai sejarah polis.
Tuai Polis Pelilih Miri, Asisten Komisioner Polis (ACP) Alexson Naga Chabu madah, ari pemerani nya, Etim udah nerima pangkat Seri Pahlawan Gagah Perkasa (SP).
Pangkat nya udah disua Yang diPertuan Agong Kelima Al-Marhum Sultan Abdul Halim Mu’adzam Shah ibni Al-Marhum Sultan Badlishah kena 6 Julai 1972.
Dikena ngenang jasa enggau pemerani Etim ngelaban komunis, raban Indu Opis Polis (IPD) Miri udah ngabas Etim ba rumah iya beserimbai Pengawa Ngingat Hari Polis Ke-216.
“Kami ngabas ke rumah Etim di Miri kelai ngenang jasa iya ti udah ngelaban komunis lebuh ngiring pengereja pengawa Opis Kereja Raya (JKR) kena 29 April 1972,” ku iya.
Sama datai, Sapit iya, Superitenden Mohd Sabri Zainol enggau tuai unit sereta tuai polis balai.
Nitih turai sejarah, Koperal Pinchin Etim nya udah ngelaban komunis kena 29 April 1972.
Etim enggau empat iku polis diasuh ngiring pengereja JKR ti mai bom mechah ke batu ari Batu 14 ngagai kuari Mubal Batu 54 Jalai Ulu Oya, Sibu.
Ba pengawa ngelaban munsuh, Sub Inspektor Ngalinuh Bala enggau Koperal Etim enggau berani nujah palan munsuh seraya ngerayap ari siti endur ngagai endur bukai lalu mujur munuh siku ari komunis.
Semangat bujang berani dikembuan Etim enggau empat raban polis bukai ukai semina udah nyelamat nyawa pengereja JKR tang mega udah muru munsuh ari endur nya.
