JULAU: Komiti Pemansang enggau Pengelikun Genturung Pendiau (JKKK) Rumah Selikau Nanga Selaut Tengah ditu nangkan sida serumah ti gawa di mengeri enda pulai ke menua ngintu Gawai Dayak taun tu.

Chairman iya, Tuai Rumah Selikau madah, nitihka aum Gawai 2020 ke diatur kena lemai Hari Minggu tu tadi, simpul aum sida serumah mutuska bala ti gawa di mengeri ditagang pulai ke menua.

“Bala rayat Rumah Selikau ti gawa di mengeri enda tau pulai ke rumah panjai dikena kitai sama nyaga pengelikun diri serumah.

“Tu nyengkaum bala kaban belayan di menua bukai tauka kaban sama gawa, bakih sereta kaban rumah panjai besemak mega ditangkan enda ngundang tauka ngelawa pangan diri.

“Reti iya, kira nadai pengawa ngabang baka selama mih kitai Gawai taun tu,” ku iya lebuh dirandau Suara Sarawak.

Ku Tuai Rumah Selikau, pemutus nya digaga berindik ari Atur Tagang Pejalai (PKP) ketegal pengerekai igi penyakit Covid-19 ke nuntung menua jam diatu.

Iya enggau sida serumah chukup angkunka jaku tangkan perintah ti enda ngemendarka mensia mayuh pulai ke menua nyerumba musin hari besai ti deka datai.

Nangkan nya ku iya, nadai pengawa bedara tauka miring niti ruai kena 31 Mei baka selama lalu pengawa nya semina diintu diri sebilik aja.

Pia mega nadai pengawa sembiang niti ruai kena ka 1 June lalu semua pengerami bukai nyengkaum pengawa berantu ti kala diperambu sebedau tu pan enda diatur ungkup taun tu.

Iya mega madah, ari penemu diri sebilik sida deka bekerekun 14 hari enda tau ngundang nandang ngagai bilik bukai sekumbang ngintu hari besai nya.

“Sama mih nyaga pangan diri kena kitai nyaga diri ari Covid-19 ti benung siga.

“Bela beajar nyaga pemeresi diri sebilik. Betemu baru kitai ba taun 2021,” simpul iya.