RABAN atlit belanda beganti 4×100 meter lelaki menua nambah midul pirak ba Lumba SEA pengudah nempa rikod nasional baru 39.03 sikin ba renggat final ba Stadium Nasional Suphachalasai, Hari Satu tu tadi.
Tim tuai rumah Thailand bulih emas nengah rikod 38.28 sikin seraya Indonesia bulih engkeraju enggau rikod 39.51 sikin.
Lebih manis, kuartet 4×100 meter menua mega mandang atlit Sarawak, Jonathan Nyepa nyadi pelanda kedua begulai enggau Mohd Fahimi Aliff Iman, Hajam Pengiran Aidil Auf sereta Muhammad Roslee Danish Iftikhar.
Keempat sida mandang pengawa belanda pemadu laju ba panggau pemadu besai seraya madam rikod nasional 39.09 sikin ti ditempa ba edisyen 2021 ba Vietnam.
Nyadi pelanda veteran, Jonathan asal ari Belaga, Bintulu ngasai pemujur nya berekat pengering runding enggau strategi lumba.
“Sebedau bepekit, aku mesan bala bakih anang ngasuhThailand berasai lantang.
“Kami nemu sida kering, nya kebuah kami ngatur strategi kediri ngambi ulih nempa penyulut,” ku iya ti keenam kali udah tama Lumba SEA.
Ku Jonathan, iya enggau bala bukai enda nangi bepekit enggau tuai rumah.
Iya ngaku midul pirak begulai enggau rikod nasional nya datai nyadi kenang manis kelebih agi tim ti enda kala belanda datai ba adan maya belatih.
“Peluang semampai bisi.
Kami besikap enggau manah.
“Maya belatih kami nadai belatih belanda datai ba adan lalu nya kebuah kami mechah rikod nasional ba hari lumba tu kenang manis,” ku iya.
Taja semina pirak, penyulut nya dikeandal nyadi kelai Malaysia enggau kuasa pechut serantau majak mimit.
“Peluang nya bisi lalu pemutus tu nunjukka kami ulih bepadan enggau sapa aja,” terang iya.
