KUCHING: Operasyen mindah raban tasah bah patut ngemerat sida ti begunaka perengka khas enggau sakit raya ti enda ulih bejalai.

Sapit Premier Sarawak ti mega Chairman Komiti Penyangga Penusah Ngenyit Nengeri Sarawak (JPBNS), Datuk Amar Douglas Uggah Embas madah, sida endang ngemerat pengelikun raban tasah ti enda ulih bejalai maya bah.

“Raban tasah ti sakit raya sereta begunaka patau lengkas patut dipindah lengkas ngagai Palan Pengenduh (PPS).

“Pekara dikemerat kami iya nya mindahka raban tu dulu dikena nyeliah sebarang penusah ti enda disadang nyadi,” ku iya.

Uggah bejaku munyi nya rambau dirandau pemberita di PPS Masejit Darul Istiqlaal, Kampung Sungai Maong ditu, kemari.

Iya madah, sepenyampau 65 raban tasah bah ti ngaul 18 ruang bilik ari Kampung Sungai Maong dipindah ke PPS.

“Raban tu mungkur orang tuai, nembiak mit, anak mit enggau sida ti sakit raya,” ku iya.

Tampung iya, Sarawak seruran nyikap diri napi penusah bah kenyau ari bulan Januari nyentuk March ninting taun bepelasarka peneleba napi penusah bah besai di Bintulu taun tu tadi.

“Inisiatif tu diambi berindik ari ujan bangat ti enda ngetu kenyau ari 20 Februari tu tadi kelimpah ulih nambah risiko bah di sekeda endur di Sarawak,” ku iya nyemetak.

Semua ejensi bekaul nyengkaum Opis Kereja Raya, Opis Parit enggau Entali Ai (DID), Raban Penyaga Orang Periman (APM), bomba, polis enggau soldadu bela digerah matau genturung berisiko sereta bejalaika atur lengkas nyema bisi penyadi tanah tusur tauka jalai putus.

Uggah ngelalau peranak ti suah dituntung penusah bah semampai bejaga sereta nyikap diri pindah lebuh dipinta raban bekuasa pindah dikena nentuka pengelikun diri empu enggau diri sebilik.

Iya muji kerejasama raban tasah, tuai raban bansa sereta Komiti Pemansang enggau Pengelikun Genturung Pendiau (JKKK) ngelanchar pengawa mindah.

Bela datai, Sapit Menteri Utiliti (Sarawak Energy Berhad enggau PETROS) ti mega Kaban Kunsil Nengeri (ADUN) Satok, Datuk Ibrahim Baki.