Kami begintir nyaga jalai penama ke Kpg Entanggor

KUCHING: Ngambika lebih engkeman nagang penama orang luar ngagai kampung sida nyerumba Atur Tagang Pejalai (PKP) tu, peranak Kampung Entanggor, Sebuyau begintir nyaga jalai besai nuju genturung pendiau sida.

Ku Tuai Rumah Kampung Entanggor, Mominn Jenta Gem lebuh PKP renggat keterubah enggau renggat kedua dipejalai sida endang bisi meri notis nagang orang luar tama ngagai genturung pendiau sida.

“Kami endang bisi engkah notis nagang orang luar tama kitu, tang ngambika atur tu terit agi pun jalai besai patut bisi dijaga awakka nadai orang luar nguji tama belalai.

“Nya alai, kenyau 14 April tu tadi aku minta kerejasama ari peranak kampung nyaga jalai besai begintir awakka atur nagang orang luar tama kitu terit agi,” ku iya.

Tambah iya, pengawa nya digaga endang sebagi ari chara nyaga pengelikun peranak kampung ari pengerekai igi penyakit Covid-19 kelimpah nitihka atur PKP ti dipejalai perintah.

“Maya diatu, pengelikun peranak kampung nyadi pekara lumur satu lalu kami minta sida piak luar baka sida ti bejual gari enggau orang datai meri kerejasama anang tama ngagai kampung kami dulu.

“Timpuh nyaga jalai besai ba kampung kami digaga dua kali iya nya ari pukul enam pagi nyentuk enam lemai enggau pukul enam lemai nyentuk pukul sepuluh malam.

“Bisi empat iku sida peranak Kampung Entanggor empu deka nyaga jalai besai ti diengkah kain mirah,” ku iya.

Tuai Rumah Kpg Entanggor, Mominn Jenta Gem.