Karoling Krismas diatur chara digital

MUKAH: Ninting taun, selalu iya orang Kristian deka ngatur aktiviti karoling ari rumah ke rumah sebedau ngintu Hari Krismas.
Tang taun tu aktiviti nya enda ulih dipejalai ketegal pandemik Covid-19 ke agi ngerekai ba menua tu.

Sedarka pekara nya, Paroki Gerija St Peter and Paul Mukah udah bejalaika inisiatif ngatur Karoling nengah online ti dipanchar terus nengah Facebook ‘Paroki Sts. Peter & Paul’s Mukah’

Pia mega, karoling nengah online nya deka dipejalai ba Gerija St Peter and Paul Mukah.

Nitihka penerang, aktiviti nya udah dipejalai kena Hari Enam tu tadi enggau deka ditampung ninting Hari Enam berengkah ari 7.30 lemai ngagai 9 malam nyentuk Hari Krismas.

Ku Chairman iya, Reverand Father Joseph Sebastian madahka iya teulihka runding tu begulai enggau raban koir Gerija St Peter and Paul Mukah.

MUJUR… Karoling dipejalai raban koir Paroki Gerija St Peter and Paul Mukah dipejalai ninting Hari Enam berengkah ari Hari Enam tu tadi.

Kebuah pia laban sida sedarka pemesai guna nelebaka diri enggau chara baru sereta ngena teknologi baru tu.
“Nya kebuah, aku enggau raban koir bejalaika inisiatif ngatur karoling dipanchar terus ba Facebook laban mayuh pengawa enda ulih dipejalai sekumbang pengerekai Covid-19 tu.

“Pia mega, kitai mesti nitihka Atur Pengawa Standard (SOP) enggau ngemeran chara baru,” ku Father Joseph lebuh dirandau pemberita Suara Sarawak.

Ninting taun, pengawa karoling ngagai rumah iya endang dipejalai belama tang semua pengawa berubah ngena chara baru ketegal pengerekai Covid-19 tu.

Iya mega madahka bala paroki diatu mesti nunda atur nya sereta ngena teknologi baru nentuka semua pengawa ti udah diperambu ulih dipejalai taja ngena chara baru.

Kelimpah ari nya, iya ngarapka mensia mayuh agi besemangat ngintu Hari Krismas taun tu taja pandemik Covid-19 agi ngerekai ba menua tu.

“Kami besampi ngarapka Covid-19 ulih punas ba dunya tu kelebih agi ba Mukah.

“Kami mega meransang mensia mayuh enggau paroki bukai sama nagang pengerekai Covid-19 enggau nitihka SOP sereta nelebaka diri enggau chara baru,” ku iya.

Suara Sarawak