KUCHING: Taja jauh ari menua asal, peranak Indonesia di Sarawak bepeluang ngintu Hari Krismas enggau richah begulai enggau bala bakih ti mandangka nengeri tu chukup tebuka ngerami komuniti menua luar nyadi sebagi ari raban bansa menua tu.

Direktor Unit Pekara Pengarap Bukai (UNIFOR), Datuk Georgina Apphia Ngau madah, Sarawak meri terima kasih ngagai raban pengereja pengawa ari Indonesia ti udah meri bantu ba mayuh bengkah sektor baka kebun dandang besai, pengawa berumah, pengerai enggau pelajar.

“Kita udah nyadi sebagi ‘kaki enggau jari’ kami ketegal gawa bebendar sereta sukung pangan diri ngagai pengelantang kitai begulai,” ku iya.

Georgina bejaku munyi nya rambau Pengerami Ngintu Krismas Begulai enggau Peranak Indonesia di Begunan Konsulat Indonesia di Kuching ditu, kemari.

Iya mega bisi bekunsi ke cherita diri empu kelai beterima kasih ti chukup besai ngagai pengereja pengawa Indonesia, nyengkaum ex-ama iya ti nyau baka diri sebilik.

“Aku kala dibantu siku ama ari Singkawang, Indonesia iya nya Kakak Yati, iya diau enggau kami pengelama 11 taun lalu iya endang dikearap aku nyaga bala anak laban aku suah mindah gawa di Semenanjung. “Iya chukup siru sereta lurus ati nyentuk ke sehari tu kami agi rindu ke iya sereta ngarapka iya meruan gerai,” ku iya.

Ku iya, kaul entara Sarawak enggau Indonesia seruran rat ukai semina ketegal pekara geografi aja,tang ketegal kaul bakih, budaya enggau kaul diri sebilik ti udah lama ditanggam.

“Nengah pengerami Krismas tu, kaul entara Sarawak enggau Indonesia ulih ditegapka agi,” ku iya.

Nerang silik agi, ku iya, pengerami tu ukai semina ngintu pengerami aja tang mega nyadi ruang endur peranak Indonesia begempuru, beperindang sereta ngerapitka takah pengelengau ke menua asal diri empu.

“Aku nemu mayuh kita rindu ke menua asal diri, lalu program baka tu ngubat pengerindu nya, kelimpah ari ngayanka pengarap ti sama ba dunya kemaya hari tu kitai begunaka mayuh agi pemaik begulai enggau menyadi dalam Kristus,” ku iya.

Iya nyemetak madah, UNIFOR bebendar ngetanka pengelantang entara jalai pengarap sereta nentuka genap komuniti bisi palan besembiang, besemekih sereta diau ba gaya bebasa ke pangan diri.

“Kitai mega meri agih belanja dikena ngaga rumah sembiang baru, ngemanahka perengkaguna enggau nyendiak perengka ti diguna ba rumah sembiang,” ku iya.