Kek Tikai Bemban Iban asil kreativiti Charlene

SIMANGGANG: Facebook Pages Rockabaker Cake diempu siku pedagang kek, Charlene Johnny ti tebilang enggau post iya ngaga Kek Tikai Bemban Iban udah dikunsi lebih 800 kali ba Facebook.

Pengempu chap dagang Rockabaker Cakes, Charlene Johnny madahka diri nadai nyangka Kek Tikai Bemban Iban nya narit ati mensia mayuh.

“Bisi siku penguna keterubah suba ngudar kek ba aku laban lebuh nya hari pengada iya tang iya nadai nemu bakani kek hari pengada ke manah.

“Aku minta gambar tikai dianyam iya laban aku meda iya landik amat beranyam tikai.

“Udah nya, bendar aku berunding sereta nguji ngaga ukir tikai anyam bebuah nunda tikai ke dianyam iya tadi,” terang Charlene lebuh dirandau Suara Sarawak.

“Ukai mudah ngaga siti kek laban aku begunaka timpuh lima jam, bedau kira ngias iya agi nundaka ukir tikai Bemban Iban nya tadi. Nya kebuah, kitai mesti puh sereta belubah ngaga kek.

“Kadang bisi salah, adu baru dataika kek Tikai Bemban Iban nya manah dipeda mata aku laban dekaka bala penguna tepantup ati meda kek digaga nya.

“Puji Tuhan, sida ke ngudar kek ari aku nadai penanggul taja bisi sekeda nginsil udar tang sida deka ngudar kek nya ungkup pengerami tauka pengawa bukai ba haribulan bukai,” ku iya sentang pemar sekumbang pandemik Covid-19.

Pia mega, Charlene madahka iya teulihka runding deka belajar ngaga kek laban rindu ngaga kek ngelama tu kelimpah lebuh nya nadai pengawa bukai di rumah pengudah badu gawa ba bank.

Ari nya, iya meransang diri belajar ngaga kek nyengkaum kus ba mayuh akademi enggau palan ngaga kek seraya dekaka dagang tu majak ngerembai enggau dikelala mensia mayuh.

“Aku empu ke meransang diri laban sebedau tu aku kala dagang nyumai bemacham bansa lauk pengudah badu gawa ba bank. Lebuh nya mayuh orang bejualka bansa pemakai enggau muka stall pemakai kediri empu.

“Pengudah meda pemayuh orang bedagang pemakai, dia aku berundingka jalai bukai ngemansangka diri dalam dunya dagang tu.

“Dia aku berundingka dagang bukai laban aku endang rindu mela pemakai,” ku Charlene madahka utai ti rindu dikereja lalu sapa ti meransang iya belajar enggau ngepunka dagang kek tu.

DIKELALA… Nama Charlene tampak rita ke alai gambar kek Tikai Bemban Iban digaga iya dikunsi lebih 800 kali dalam Facebook.

DAGANG KEK

Ku peranak asal Long Jek, Baram tu, iya berengkah ngepunka dagang kek tu ba taun 2018.

“Kami sebilik engka nadai siku landik ngaga kek tu tang bai ati keran enggau rindu ngaga kek tu, aku lalu ngepunka dagang kek tu. Pia mega, aku tekait ati meda pemanah keranjai jari sida ke landik ngaga kek tu pemuas ke meda ruai Facebook sida.

“Aku pen berunding nama kebuah aku enda nguji ngaga kek baka sida laban kitai mega tau landik enti belatih tauka ngulu kus,” ku Charlene nusika diri lebuh teulihka runding ngepunka dagang tu.

Indu penakan Iban Kenyah tu madahka iya ngepunka dagang kek tu ngena puku RM150 laban ke meli hand mixer mit berega RM89.90 enggau kereban ngaga kek ke bukai baka tepung.

Anak tuai ari tiga iku diri menyadi tu madahka iya kala nerima kus sebedau ngepunka dagang kek tu lalu entara kek digaga iya nya Blackforest, Red velvet Cheese, Blue Velvet Cheese, Tiramisu, Tikai Bemban Iban sereta ke bukai.

Tu nyengkaum Cafe desserts patisseries Course at Amy Decorating Institute, Basic Cake Baking course di Alya Resources Academy, Korean Buttercream Course di Hello Baker’s Academy, Basic Bun Baking di Rumpun Mesra Academy.

“Diatu, aku belajar baru dalam Professional and Executive Pastry Program di baruh Unimas Business School twinning begulai enggau Yahoos Skill School.

PEMANAH KERANJAI JARI… Kek Tikai Bemban Iban digaga Charlene ke dikerindu bala penguna.

PEMANAH KERANJAI JARI

“Pengudah ngulu bemacham kus ngaga kek tadi, aku lalu berengkah ngaga Facebook Pages Rockabaker Cake enggau ngambi udar ari bala penguna.

“Aku ngena nama Rockabaker Cake laban aku rinduka genre rock,” ku Charlene seraya tuchum lebuh nusui kebuah ngaga nama Facebook Pages nya.

“Keterubah berengkah ngambi udar tadi, aku chukup gaga tang bisi asai nangi enggaika enda ulih tetangkupka peminta bala penguna.

“Tang Puji Tuhan, bala penguna nerima manah sereta muji keranjai jari aku kelimpah aku mega bisi ngaga kuie, pies enggau tart. Bemacham bansa kek digaga aku nyengkaum kek kawin, kek betunang enggau kek bukai nitihka peminta bala penguna.

“Ari dagang kek tu tadi, aku untung RM2,000 ngagai RM3,000 sebulan nitihka pemayuh udar ti diterima,” ku Charlene ti berasai gaga laban dagang iya mujur sereta nerima timbal ke chukup manah ari bala penguna.

PUH

Charlene madahka pelasar online baka Facebook udah mantu iya ngelakuka dagang kek enggau chara ke muntang laban semua kitai jeman diatu bela bisi Facebook magang.

Ku iya, ruai Facebook enggau Whatsapp nya mih pelasar tauka lubuk jereki iya ba dunya dagang tu kelimpah rumah ti mega nyadi mini bakery.

“Nyadi, aku ngeletak rega kek tu nitihka pemerat enggau ukir ti dikedeka bala penguna tang Puji Tuhan naka tu, bala penguna sigi setujuka rega diletak aku.

“Bisi sekeda penguna tu dekaka bemacham asai kek datai tiga ngagai empat asai tauka dikumbai flavour, ukir ke bebida lalu nya mih entara pemar ditapi aku lebuh ngaga kek tu.

“Tang aku rindu ga lebuh penguna minta bemacham bansa ukir ba kek ngambi aku landik agi ngaga bemacham kek dudi hari. Pengawa ngaga kek tu ukai mudah kelebih agi lebuh bala penguna dekaka aku nunda ukir tauka kartun dikedeka sida.

“Naka ulih mih tudah diri ngaga kek nitihka peminta bala penguna laban munyi ku jaku ribai, ‘customer always right’. Nya kebuah enggai nyadi ga nulak peminta bala penguna tadi,” ku iya nerang.

Ba pengujung randau, Charlene meri terima kasih ngagai bala penguna ke udah nyukung dagang kek iya ngelama tu.

Nambahka iya, iya mega meri besai terima kasih ngagai Suara Sarawak laban udah meri peluang ngangkatka dagang kek tu ngambi dikelala mensia mayuh.

Nya alai ku Charlene, barang sapa ke deka meli tauka chunto kek ke udah digaga iya, kita tau ngelawa Facebook Pages Rockabaker Cakes tauka Facebook, Charlene CJ tauka whatsapp ngagai lumur aku, 0142072784.

PUH… Charlene mujur ba dagang kek dataika iya bulih untung besai enggau nerima mayuh udar ari bala temuai.