KUCHING: Kelab Komuniti Iban Balau disadang deka dikemendar Opis Pengerejista Gerempung (ROS) ujung bulan tu (Oktober).
Protem Komiti Sapit Chairman Kelab tu Lt Kol (B) Mohd Melintang Abdullah madah tuju penumbuh kelab tu dikena nyintalka agi kaul Iban Balau enggau pangan diri.
“Diatu kami ba proses ngerejister, pengawa rejister online udah digaga pun bulan tu tadi lalu disadang dikemendar ROS ujung bulan tu (Oktober 2020).
“Nyadi kelab tu disadang deka dipenyadi minggu kepenudi bulan baru (November 2020),”ku iya madah ngagai Suara Sarawak.
Sebedau tu, kaban Protem Komiti Kelab tu udah ngatur penemuai basa ngagai Sekretari Perintah Nengeri Datuk Amar Jaul Samion, kemari.
Tu keterubah iya sida nemuai ngagai Jaul ti mega chairman protem kelab nya.
Nengah kelab tu mega, kelab deka mai bala mayuh chakah agi ba pengawa ekonomi, pelajar enggau main asal.
Nambahka nya, ari kelab tu, komiti deka ngatur program rama, lumba enggau main sereta program bukai ti ngaul semua raban sida.
Sida mega merambu ngatur program bekaul enggau pansik sejarah, main asal enggau pengawa bekaul enggau Iban Balau ke bukai.
Sama datai rambau penemuai basa tu iya nya Sapit Chairman Lt . Kol ( B) Mohd Melintang Abdullah, Christhe Mansom (Sekretari) sereta bala raban bukai, Prof Madya Dr Philip Nuli Anding, James Jawat, Dato Grunsin Ayom enggau Stell Sindau.
