Kelas Ajat Lelaki Asadia nerima sambut ti manah

KUCHING: Program Kelas Ajat Lelaki Akademi Sarawak Dayak Iban Association (Asadia) nerima sambut ke manah ari 18 iku penyereta.

Program ke belabuh kena 9 Julai tu tadi diajar Henry Guya.

Sida ke ngambi bagi ba program tu ukai semina orang ke udah bekereja tang mega nembiak Universiti enggau iya ke agi besekula.

Ketuai Asadia Mabong Unggang madah, bala penyereta program serak tu bisi nya datai ari menua jauh mandangka enti bisi peluang belajar ngajat, sida ke lelaki bela enda muai peluang nya.

” Arapka sida ti belajar ukai semina ngambi penemu kediri empu aja tang sama besaup ngerembaika main asal nya enti udah pandai jemah ila,” pia ku iya madah.

SERETAI…Bala penyereta bereta ngatur singkang nitih pengajar.

Mabong madah, kelimpah ari ngenan main asal ngajat sida ti belajar ngajat mega deka ngenan ke ngepan asal bansa Iban laban maya ti ngajat sida deka beguna ke ngepan asal nya.

“Arapka mayuh agi kelas main asal ditumbuh di Sarawak awakka main asal kitai bansa pegari di serata dunya,” ku iya enggau ati andal.

Kelimpah ari Kelas Ajat Lelaki, Asadia mega bisi muka kelas main asal bukai baka Ajat Indu enggau betabuh, Ajat Orang ulu, Birejang Beuh (sebansa ajat Bidayuh ari Bau), Kelas Sape enggau Belikan, Kelas Kuntau, kelas ngaga tangu enggau kelas ngaga kain Burie.

Asadia mega bisi muka kelas main asal iya nya Ajat Indu, Betabuh enggau Gendang pampat ba Batu Gong Siburan.

Mensia mayuh ti deka nemu penerang bekaul enggau program diatur Asadia tau ditanya ba Mabong nengah lumur 0126925562.