KUCHING: Budaya integriti ti tinggi ba staf pengerai di Sepital Besai Sarawak (SGH) ti ngatur agih belanja ngelui RM800 juta setaun enggau nadai isu makai suap patut nyadi malin enggau chunto ngagai sektor perintah bukai.

Ku Sapit Premier Sarawak, Datuk Amar Dr. Sim Kui Hian, SGH tau disebut enda kala ngereja salah guna kuasa sekali ke ngaul lutur tauka indu misi.

“Kala kita ninga lutur minta bayar ngelih gintir? Nadai. Indu misi mega nadai isu.

“Pekara tu endang patut ditungkap, taja pia sistem ngatur belanja besai ulih mengkang beresi,” ku iya ba Pengerami Ngintu Hari Integriti Opis Parit enggau Entali Ai (DID) Sarawak, ditu kemari.

Nya kebuah, ku iya, peneguh nya bepun ari integriti ti ditegap ba latih sereta kaul bepelasarka pengandal entara lutur enggau pesakit.

Ngenang silik, Dr. Sim madah, ba sepital peribit, pesakit sanggup nganti lama enggau bebayar lebih tang dalam sistem perintah, kitai enda meda budaya baka nya.

“Tu nunjukka rega enggau etika ngesan pangku pengawa besai,” terang iya.

Berebak enggau nya, iya nyemetak madah ke pemujur SGH ukai semina ba sukut servis tang mega diaku nyadi sepital pansik pemadu manah di Malaysia.

Ku iya, pemujur nya signifikan agi berindik ari SGH beoperasyen enggau urung 1,000 staf baruh agi dibanding sepital ba Semenanjung.

“Taja suntuk staf, sida agi ulih bejalaika pansik tikas dunya nyengkaum tungkap keterubah first-in-human ti dipilih ba Asia Pasifik,” ku iya.

Nya alai, Dr. Sim meri terima kasih ngagai semua orang gawa perintah ti regas gawa nempa Sarawak ti besemekih seraya nyemetak madah ke pengawa negap integriti nyadi pugu pemansang nengeri ti meruan enggau dibasa.