KUALA LUMPUR: Menteri Besai, Tan sri Muhyiddin Yasin ngaku kimpin Pengawa Bepilih Nengeri (PRN) Sabah entara kebuah kes Covid-19 majak nambah.

Pia mega, iya madahka mensia mayuh kurang ngasika Atur Pengawa Standard (SOP) rambau PRN Sabah empai lama.

Iya madah, enti sema Atur Tagang Pejalai (PKP) diterit baru, atur nya deka meri empas besai ba sektor ekonomi menua.

Taja pia, iya minta semua rayat anang irau sereta enda ibuh bekunsika berita ti apin temu pengamat.

Nambahka nya, iya nyamin pengawa nyidi kaul kes muntang agi ngena aplikasyen MySejahtera dibanding renggat tumu Covid-19 ngerekai ba menua tu.

Berebak enggau nya, iya madahka bekal ubat, ventilator enggau Kereban Nyaga Diri (PPE) chukup dikena mutarka bala pesakit naka diatu.

Ba lansa bukai, bisi dua kluster baru ditemu iya nya Kluster Batu di Taiping, Perak enggau Kluster Ramai-Ramai di Sandakan, Sabah ngujungka bisi 39 kluster ti agi ngerekai ba Malaysia.

Kelimpah ari nya, Muhyiddin nangkan semua rayat nitihka SOP enggau seruran nyaga pengerai diri, suah agi masu jari ngena sabun, ngena sengkabung mua sereta anang bejalai ngagai endur ti dedat.