Kes orang berikan ditan TNI patut bai ngagai perintah besai

KUCHING: Kes seraban orang berikan (nginti) Sarawak ke ditan Soldadu Nasional Indonesia (TNI) patut dibai ngagai perintah besai.

Kepala Menteri Datuk Patinggi Abang Johari Tun Openg madah, laban Ejensi Penerit Adat Maritim Malaysia (APMM) udah ngenuku penyadi nya, nyadi APMM patut ngaga atur ke patut.

“Aku nadai penerang silik pasal isu tu. Tang laban piak APMM udah ngenuku, tejuka sida maritim bejalaika atur.

“Kes tu patut dibai ngagai perintah besai,” ku iya maya dipinta nimbal pasal atur digaga Sarawak bekaul enggau penyadi nya.

Kena 15 March tu tadi, seraban orang berikan (nginti) rayat Sarawak, siku rayat Indonesia enggau dua krew sebuah kapal ditan TNI di Pulau Batang, Kandang Pulau Menua Riau Indonesia.

Taja pia, sida udah dilepas 15 udah nya pengudah randau manah dipejalai piak APMM enggau Kaunsil Pengelikun Tasik Indonesia (BKLI).

Penulung Direktor Kanan Unit Carilamat enggau Bantu Tasah Ngenyit APPM Sarawak Leftenan Komander Maritim Musli Jaffar madah, bot ‘Nemo’ ditan ba kandang tasik Malaysia iya nya 52.3 batu nautika ari timur tasik Tanjung Datu, tang semak adan Malaysia-Indonesia.

Taja pia, ku iya sebuah agi bot orang berikan Bubu SF1-66(C) ditan piak Opis Menteri Berikan Kandang Tasik Indonesia (KKP) ba kandang tasik Malaysia, 71.2 batu nautika di barat tasik Tanjung Sirik kena 12 March.

Kenu ku iya, bot nya dipenggi peranak menua tu enggau tiga krew peranak Indonesia enggau diatu, APMM agi ba tikas proses berandau ngelepaska ketetiga krew nya.

SCATFAIR 2019…Kepala Menteri Datuk Patinggi Abang Johari Tun Openg (tiga kanan) rambau ngulu program Sarawak Career and Training Fair (SCaTFair) 2019 ba Palan Aum Borneo Kuching (BCCK) tadi.- Gambar Ghazali Bujang

Suara Sarawak