TANJONG MANIS: Kaban Parlimen Tanjong Manis, Ir Yusuf Abdul Wahab ngelalau raban orang berikan pansut beraban tauka nangguhka dulu pengawa berikan sekumbang musin landas Monsun Timur Laut.
Diatu, ku iya, raban orang berikan ti bejalaika pengawa nangkap ikan sekali ke ba sungai tauka tasik patut bejimat sereta ngemerat pengelikun diri dikena nyeliah sebarang pekara ti enda manah nyadi.
Ku iya, gaya hari kemaya hari tu enda tentu sereta ulih ngenataika pekara ti enda manah ngagai sida ti ngiga asil babas enggau nebing sungai.
“Berapa hari ti udah, kitai suah ninga mayuh kes orang lenyau ba sebelah babas, sungai enggau endur bukai.
“Nya alai, aku ngelalau mensia mayuh ngambi enda pansut kediri.
“Bai meh kaban nyempulang kita laban sida ulih mantu kita lebuh bisi penusah,” ku iya lebuh dirandau pemberita rambau matau status Ops SAR lelaki lenyau ba Batang Paloh ditu, tadi.
Iya nyemetak madah, pengawa nurun ke sungai tauka tasik ti nadai ngulihka sebarang penerang tumu ti bekaul ulih mai penusah ngagai sida laban sebedau tu mayuh orang napi penanggul nya.
Rambau bejalaika pengawa matau, Ir Yusuf bepeluang mendingka licha operasyen lebuh ngelawa enggau meri bantu ngagai tudah sebilik enggau raban SAR nengah Penghulu Ubi Gudol.
Ba lansa sebaka, Ops SAR ditangguh tadi berebak ari gaya hari ti enda manah lalu deka ditampung baru pagila.
