MIRI: Klinik Pengerai Mengeri Miri (KKBM) ti baru bepalan ba Jalai Padang Kerbau ditu deka berengkah beoperasyen kena 2 Januari taun baru.
Begunan KKBM nya ngembuan dua ringkat lalu ringkat keterubah ungkup pengawa ngerejister, klinik indai enggau anak, unit emijensi, klinik pesakit luar, makmal enggau unit radiologi.
Nangkan nya, ringkat kedua ungkup opis pengatur pengawa, bilik aum, unit pelajar pengerai, unit rehabilitasyen, klinik ngeli enggau surau.
Tuai Pakar Perubat Ruang Bilik Bagi Menua Miri ti mega pegawai bisi tanggungpengawa ba KKBM, Dr Maurice Steve Utap madah, bisi 12 bansa servis disedia klinik pengerai nya.
“Tu nyengkaum servis berubat pesakit luar, berubat emijensi, nyaga pengerai indai betubuh bisi sereta pengerai anak mit enggau nembiak mit.
“Pekara tu mega mungkur servis pengerai orang indu, perambu ruang bilik, kaunseling pemakai, farmasi, x-ray, makmal, rehabilitasyen sereta klinik ngeli,” ku iya.
Dr Maurice mansutka jaku nya nengah ripot berita Unit Komunikasyen Perintah Sarawak (UKAS) ditu, sehari tu.
KKBM nya bepalan semak Sepital Miri lalu beoperasyen berengkah Hari Satu nyentuk Hari Lima pukul 8 pagi nyentuk 5 lemai aja.
Taja pia, muak ke ujung minggu iya nya Hari Enam enggau Hari Minggu sereta kemisi hari besai, klinik nya tutup.
Nya alai, mensia mayuh kelebih agi komuniti Miri diperansang ngulih servis berubat ba KKBM nya kelimpah ngasika atur klinik ti udah ditetap.
