Kluster Seruas di Beluru dikenuku nyadi kluster baru di Sarawak

KUCHING: Opis Pengerai Nengeri Sarawak ngenukuka siti agi kluster baru dirikodka ba Pelilih Menua Beluru dikumbai Kluster Seruas.

Komiti Penyangga Penusah Ngenyit Nengeri (JPBN) dalam siti penerang media lemai tu tadi madahka kluster tu ngaul sebuah rumah panjai di Serawong Tengah, Seruas, Bakong ba Pelilih Menua Beluru.

Kes indeks kluster tu datai ari kes ke-4,308, siku indu umur 61 taun ti ditemu lebuh beperesa ketegal bisi nunjukka kelai dirampit kena 28 Januari tu tadi.

Kes berampit dipelaba ngerekai ari orang bekaul lebuh maya ngusung pengawa rabat di rumah panjai nya kena 25 nyentuk 27 Januari tu tadi.

Rumah panjai nya diatu udah diletakka ba baruh Atur Mindah Betagang Diteritka (PKPD) lalu asil ngiga orang bekaul ngagai kes indeks sereta peranak ba rumah panjai nunjukka bisi 58 kes positif baru nambah.

Naka pukul 12 tengah hari tadi, bisi 150 orang udah diperesa ke alai 59 ditemu positif, 29 ditemu negatif enggau 62 agi nganti pemutus peresa.

Tu ngujungka penyampau kluster ba menua tu nambah 15 iti kluster iya nya Kluster Seruas, Kluster Sebangkoi, Kluster Jun Heng, Kluster Bintang Daily, Kluster Jalan Pengiran, Kluster Tabong, Kluster Indah Riang, Kluster Bedayan, Kluster Rakut, Kluster Bukit Sekubong, Kluster Jelita, Kluster Pasai, Kluster Keranji Tabuan, Kluster Bah Sayap enggau Kluster Stutong.

Suara Sarawak