‘DITUNU’ dalam benda digaga ari tanah ladu ke beumur lebih 20 taun dibai ari menua China nyadi resia penyamai kuie Kompia Wong, sebansa kuie asal ke chukup tebilang ba menua Sibu ke dulu suba dikumbai Maling.
Tukang ngaga kuie ke mega pengempu dagang benama Wong madah, penyamai kuie nya datai ari ‘oven’ asal ke ngasuh kompia digaga iya bebida ari endur bukai ke sama bisi dijual ba Pasar Sibu.
Nya alai, enda ngelui kedai iya ba lorong mit enggau enda entu tampak dipeda mensia mayuh ba Jalai Tukang Besi Semak Pasar Besai Sibu ditu seruran dedat endur orang bebelika kuie kompia nyamai iya.
Kelimpah ari kompia, kuie bukai ke ‘lejen’ mega bisi dijual dia baka kuie Sarawak, kuie bulan, kuie telu, kuie baulu enggau bemacham kuie asal ke bukai.
“Kompia suah abis dulu ari kuie ke bukai.
Nya kebuah sida ke datai meli enda irau laban kuie endang digaga sehari nya lalu abis dijual sehari nya mega.
“Pia mega kuie bukai, tebal agi bala penguna rindu agi meli kuie ke manis-manis, bisi puak baka kachang tutuk digulai enggau lenga enggau gula pasir.
“Kuie Sarawak ke bechura burak sereta manis mega laku baka kompia kelebih agi sida ke tuai rindu makai kuie tu, jelan pemanis enggau bisi ditabur kachang tutuk mimit,” ku iya.
Wong ngepunka dagang kuie nya kenyau ari 20 taun ke udah ngena chap dagang Sheng Kee 63 Confectionery, kedai ba dalam lorong pasar lama.
Iya madah, bisi bida ari chara ngaga kuie enggau bedagang ke ngasuh dagang iya semampai laku taja mayuh kedai bukai ke bejalaika dagang sebaka.
“Utai enggau kereban digaga ngaga kuie, maya nunyau repu tepung enggau ‘nunu’ kuie tu dalam benda tanah liat ke besai nya ti ngasuh kuie tu chukup nyamai.
“Bau rengut kuie ke ngesuh meali-ali ari benda nya lebuh kuie chukup mansau ti ngasuh orang datai kia baka ke udah kena jayau sema jaku.
“Tambah mega aku ngena arang kayu dikena ngetanka asai asal kuie nya laban bisi bida enti ngena dapur gas,” terang iya.
Ke penerang, kompia kebendar kuie ti tebilang ba sekeda menua ba Asia nyengkaum Indonesia mega ke bisi diuan raban bansa Tionghoa asal ari Foochow, China.
