KUCHING: Unit Pekara Pengarap Bukai (Unifor) betuaika Sapit Kepala Menteri Datuk Amar Douglas Uggah Embas udah ngatur pejalai nemuai meri basa ngagai Kepala Menteri Datuk Patinggi Abang Johari Tun Openg ba opis iya, pagi kemari.
Nitihka penerang, batang tuju penemuai nya laban deka meri penerang pasal pengawa ngaga Kompleks Opis Unifor 10 ringkat ba taba 1.2 hektar pemesai.
Projak nya disadang bepun bulan September tu enggau deka dipejalai pengawa nasih tanah ba Jalai Ong Tiang Swee.
Begunan kompleks dipelaba beungkus RM70 juta mega disadang tembu ba timpuh dua taun nitihka perambu.
Dulu ari nya, Uggah udah madahka Kabinet Nengeri Sarawak udah ngemendar tanah pemesai tiga ikar ba Jalai Ong Tiang Swee nyadi taba ngentak kompleks Unifor.
Ku iya, kompleks tu deka nyadi opis Unifor sereta perengkaguna bukai baka ungkup latih, bilik baum enggau aktiviti bukai pengudah udah tembu digaga ila.
