KUCHING: Komuniti Dayak diperansang lebih chakah sereta regas agi bejalaika tanggungpengawa dalam pemansang rama, budaya enggau ekonomi Sarawak senutuk enggau ubah ti jampat nyadi di wilayah tu.

Sapit Presiden Serakup Nasional Dayak Sarawak (SDNU), Christopher Gira Sambang madahka, ubah landskap nengeri tu lebih agi ba jeman pasca pandemik begunaka komuniti Dayak ti lebih besedia, progresif sereta ngaul diri dalam gaya pemansang kemaya hari.

Ku iya madah, SDNU mesti mengkang relevan sereta proaktif dalam nyukung kuing tuju pemansang Sarawak, senutuk enggau Visyen Sarawak 2030 ti ngemeratka inovasyen, meruan sereta inklusiviti.

“Dunya diatu berubah enggau jampat lalu kitai mega patut berubah. SDNU mesti terus mengkang relevan sereta proaktif dikena nyukung juluk kitai senutuk enggau Visyen Sarawak 2030 iya nya visyen ti ngemeratka inovasyen, pemanah enggau inklusiviti.

“SDNU mengkang nyadi pelasar beguna ngagai sada nyawa komuniti Dayak dalam pemansang rama, budaya enggau pelajar Sarawak,” ku iya rambau Pengerami Makai Lemai Aum Besai Tiga Taun Sekali (TGA) Serakup Nasional Dayak Sarawak (SDNU) di Kuching, malam tadi.

Iya mega nyemetak madahka dunya diatu majak jampat berubah, lalu komuniti Dayak mesti bela nyingkang ke mua dikena nentuka komuniti nya enda tinggal dalam arus pemansang nengeri.

Berebak enggau nya, Christopher madahka, TGA Ke-37 nyadi siti pekara ti beguna amat dikena beratika pemujur SDNU seraya ngelangkar kuing baru ti lebih inklusif dikena nentuka peluang pelajar, latih enggau pemansang disediaka ungkup rebak baru bansa Dayak.

Ku iya nambah, pengawa negapka raban nembiak nyadi kunchi dikena ngemudahka sida bejalaika tanggungpengawa ti beguna dalam pengawa iring tuai enggau pemansang Sarawak jemah. — TVS