SIBU: Konsortium tiga palan pelajar tinggi deka bejalaika analisis gaya bekaul konsep Mengeri Siru Ke Nembiak Mit ti dikena enam raban bekuasa lokal (PBT) ba Sarawak.
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, tiga palan pelajar tinggi nya nyengkaum Universiti Teknologi Sarawak (UTS), Universiti Swinburne enggau Universiti Malaysia Sarawak (UNIMAS).
“Enam PBT ti ngena konsep nya baka Dewan Bandaraya Kuching Utara (DBKU), Majlis Bandaraya Kuching Selatan (MBKS), Kaunsil Mengeri Padawan (MPP), Kaunsil Mengeri Sibu (MPS), Majlis Mengeri Miri (MBM) enggau Kaunsil Pemansang Bintulu (BDA).
“Semua PBT tu udah nyain sempekat enggau UNICEF (Turu Nembiak Mit Serakup Bansa Besatu) dikena bejalaika inisiatif Mengeri Siru Ke Nembiak Mit,” ku iya.
Fatimah mansutka jaku nya ba aum pemberita pengudah ngulu Aum Kaunsil Penyanding Penemu CSSC Sibu ditu, kemari.
Terang iya, pengawa diatur pengudah nya baka ngaga analisis gaya senentang chara mengeri ngambi bagi ba pengawa siru ke nembiak mit.
Pansik nya, ku iya nyemetak, deka dipejalaika konsortium tiga palan pelajar tinggi nya dikena meda pekara ti udah dikereja tauka enda dikereja enam PBT nya ba pengawa sida nyadi palan siru ke nembiak mit.
“Ketetiga palan pelajar tinggi tu deka mantaika perambu ngambi PBT chakah ngamat inisiatif nya.
“Pengawa matau dipejalaika UNICEF dikena nentu gaya palan tu ba timpuh tiga taun. Kitai ngarap mengeri tu deka diaku UNICEF nyadi Mengeri Siru Ke Nembiak Mit,” ku ADUN Dalat nya.
