KUCHING: Kontinjen Kuching dipadu nyadi champion Lumba Olimpik Khas Sarawak Renggat Ketujuh 2025 ti dipejalai pengelama tiga hari, berengkah ari 2 ngagai 4 Mei tu tadi.
Pekit nya mujur ngempuru 358 atlit khas ari lima pampang Lumba Olimpik Khas di Sarawak di Kuching, Sibu, Miri, enggau dua pampang baru iya nya Bintulu enggau Samarahan.
Menteri Pemansang Indu, Nembiak Mit enggau Pengelantang Komuniti Datuk Seri Fatimah Abdullah madah ke pengawa ngatur lumba nya ulih mantu ukai semina negapka atlit ti udah bisi tang mega nyadi pelasar nyerungkai penau baru.
“Kitai meda mayuh penau baru dikelala ba pekit tu, atlit pemadu biak ti dikelala kami ngembuan penau baru ti beumur semilan taun.
“Pengawa tu dikena meri peluang ngagai atlit khas kitai ngasaika lumba enggau main, begulai sereta nempa pengandal diri,” ku iya.
Fatimah bejaku munyi nya ba pengerami penutup Lumba Olimpik Khas Sarawak Renggat Ketujuh 2025 ba Palan Aum Hikmah Exchange (HEEC) malam, tadi.
