Kort Adat nipakka pemansang jeman

KUCHING: Perintah Sarawak benung ngatur pengawa nyiri perunding ungkup pengawa mansik bemacham pekara pasal Kort Adat di Sarawak.

Sapit Kepala Menteri, Datuk Amar Douglas Uggah Embas madahka perunding tu deka mansik ripih organisasyen, operasyen, pengatur pengawa, ubah enggau bidang kuasa khas ba Kanun Kort Adat 1992.

“Asil pansik tu deka nyadi pelin besai enggau atur pengawa ti diperambu ungkup diripih baru ba Kort Adat ke bisi diatu.

“Tu nyengkaum ripih organisasyen enggau orang gawa, kuasa khas enggau bidang kuasa belalauka tanah adat bansa asal, undang-undang enggau adat, kapasiti organisasyen sereta ngena sistem komputer ba Kort Adat,” katanya.

Iya mansutka jaku tu lebuh nyimpul jurai beserimbai enggau Aum Dun Ke-18 ditu, tadi.

KEMERAH… Datuk Seri Douglas Uggah Embas berandau enggau bala bukai rambau aum Dun Ke-18 tadi.

Kenu ku Uggah, pansik tu begunaka timpuh semilan bulan endur iya tembu dipejalai.

“Pangku pengawa enggau operasyen Kort Adat agi ulih engkeman enggau dikena nyauka 70 peratus peranak menua tu.

“Nya kebuah Perintah Sarawak ngaku pangku pengawa besai Kort Adat ba atur pengawa dikena negika pekara ti patut ba tanah Adat Bansa Asal (NCR) ti dipetalat,” ku iya nerang.

Berindik ari nya ku Uggah, pansik ti meruan patut dipejalai dikena ngubah Kort Adat Sarawak ngambi ulih nangkup peminta jeman.

“Nya alai, nentuka Kort Adat sedia napi pemar dalam komuniti asal kelebih agi meransang pengawa pemansang di kandang menua pesisir enggau ekonomi digital,” ku iya.