Kort Bumiputera Sarawak deka diadu seikas enggau Kort Sivil

KUCHING: Perintah Sarawak udah mutuska siti pansik silik deka digaga baru dikena mansik semua tusun pengawa ngerejister Kort Bumiputera Sarawak awakka nyadi sebuah institusyen undang-undang ti ngati kediri lalu bisi otonomi seikas enggau Kort Sivil tauka Kort Syariah.

Pekara nya dipansut Menteri Muda Undang-Undang enggau Adat Bumiputera, Datuk John Sikie Tayai nyerumba Aum Dun ke-18 Renggat Keempat ditu, kemari.

Kenu ku iya rambai jaku pansik tu udah mujur digaga lalu perintah udah nyiri komiti Pemandu enggau komiti teknikal dikena nentuka pansik tu dipejalaika nitih atur malin lalu asil pansik tu ila dikearap ulih nitih juluk ati Perintah Sarawak.

Iya nyaut tanya ari Adun Tellian-PBB, Yussibnosh Balo pasal kuasa Kort Bumiputera dalam kes ti bekaul enggau adat sereta tanah adat di Sarawak.

“Naka 28 Februari, bisi 2,370 kes tauka 50.6 peratus kes nuntut Sivil udah mujur diputarka lalu bisi tingal 2,314 kes tauka 49.4 peratus agi bedau diputarka.

NYAUT TANYA…Menteri Muda Undang-Undang enggau Adat Bumiputera, Datuk John Sikie Tayai benung nyaut tanya ari ari Adun Tellian-PBB, Yussibnosh Balo pasal kuasa Kort Bumiputera dalam kes ti bekaul enggau adat sereta tanah adat di Sarawak.

“Bagi kes peminta ti dikumbai komiti Bumiputra ba baruh kuasa Kort Bumiputera Residen udah ngerejister ke 1,657 iti kes. Ari penyampau tu 269 kes tauka 16.2 peratus udah mujur diputarka lalu 1,388 kes tauka 83.7 peratus benung dalam proses deka diputarka,” ku iya.

Kelimpah nya, iya nerang Kort Bumiputera Sarawak diatu bisi 72 iku majistret dikena mutarka kes sivil baka belaya ke tanah adat Bumiputera ti sah.

“Bisi dua bengkah kategori majistret ba kort tu iya nya keterubah sida ti dichiri ngena chara kontrak ari taun ke taun. Bala Majistret tu nyengkaum siku presiden Kort Bumiputera Rayuan (President Kort Apil Bumiputera), dua iku majistret Kort Bumiputra Residen enggau 17 iku majistret Kort Bumiputera Bagi Menua.

“Kategori kedua iya nya penyampau 25 iku Ex-Ofico tauka sida ti dichiri automatik ari penuduk ke dipegai mega dipilih ari 12 iku Residen Bagi Menua ti dikumbai Majistret Kort Residen Bagi Menua enggau 40 iku pemesai pelilih mit ti dikumbai Kort Majistret Bumiputra Pelilih Mit,” ku iya.