Kuching Skills College ngatur pejalai ngusung pelatih baru

KUCHING: Pengangat hari enggau pengelebat ujan ba sekeda endur enda nekul pejalai raban Kuching Skills College (KSC) ngusung bala pelatih baru sida.

Ketuai Pemesai Eksekutif iya, Novert Sullang madah, tuju pejalai sida nya deka mendingka timbal penemu enggau penanggul ditapi bala pelatih lebuh ngulu kus chara online sekumbang timpuh Atur Tagang Pejalai (PKP) tu.

Ku iya, piak KSC ngena peluang nya berandau betunga mua seraya nanyaka rita bala pelatih ke baru rejister sereta apin tama kelas baka senior sida.

“Kami sebuat bebagi tubuh ngagai tiga raban ke alai raban keterubah ngelawa bala pelatih baru ti diau mendam ba Kuching, Kota Samarahan enggau Asajaya.

“Raban kedua ngatur pejalai ngagai pelatih baru ba kandang menua Serian, Simunjan enggau Balai Ringin seraya raban kepenudi napatka menua Sri Aman, Batang Ai, Saratok, Sibu, Julau enggau Kapit,” lansa iya.

KIRUH… Bala staf KSC mantu bala nembiak ngisi pom.

Novert dirandau Suara Sarawak lebuh ngetu ba Pasar Sibu, ngambat bala pelatih baru ke datai ari Kapit lalu randau mujur diatur ba sebengkah hotel tebilang dia.

Ku iya, sida mupuk ke Sri Aman, Batang Ai, Betong enggau Saratok kena Hari Enam tu tadi lalu lanjur ke Sibu sereta bemalam dia semalam.

“Malam keterubah di Sibu, kami bisi ngatur randau begulai enggau bala pelatih lalu pagi Hari Minggu, kami berandau enggau bala pelatih ke datai ari Sibu enggau Kapit ba Sibu Jaya.

“Udah nya bala nampung pejalai ngelawa bala pelatih ke diau di Bagi Menua Julau sebedau nikal pulai ke Sibu baru, muakka malam kami sebuat limpang berandau enggau bala pelatih.

“Pagi hari siti baru bala kami mupuk pulai ke Kuching, mai seribu kenang,” tusi Novert lenak.

Ngelansa pasal tuju pejalai nya, iya madahka sida deka ngembing enggau meri peransang kelebih agi ngagai bala pelatih enggau apai indai ti datai ari ruang bilik seranta ke diau ba menua pesisir.

KENANG KAMI… Novert (kiba) enggau bakih iya begambar ba pak jalai ke pengingat seduai kala nujah menua nya.

Ku iya, peluang kedua ti diberi tu patut direbut ngambika sida teulihka kereja enggau pengidup ti menyana jemah ari penemu dipelajar sida ba palan pengelandik kulinari tauka mela pemakai.

“Kitai dekaka bala pelatih baru ti belajar chara online sekumbang PKP tu nemu enggau meretika utai dipelajar sida.

“Tu sebagi ari chara kitai ngenyemakka takah pengidup bala nembiak ke diau di menua pesisir enggau mengeri sereta mantu ngubah pengidup sida sebilik.

“Tu mega peluang kami meri penerang ti terang agi pasal kolej enggau kus ngagai apai indai pelatih baru sereta nyaut sebarang tanya bekaul pelajar bala anak sida,” terang Novert.

Laban tebal agi menua bala pelatih nadai nerima arus internet ti meruan, piak kolej nganjung dokumen nengah email tauka WhatsApp.

Nya kebuah pejalai sida Novert sehari nya endang deka mantu bala pelatih baru ngisi pom bekaul baka peminta jail pelajar pengelandik enggau elaun ninting bulan sekumbang ke belajar ba palan nya.

“Kami sedar, enti sema dokumen nya dianjung nengah pos begunaka timpuh chukup lama kelimpah penanggul bukai.

“Ari nya, piak kami bejalaika inisiatif ngelawa bala pelatih di menua sida empu, mantu sida ngaduka sebarang dokumen ti patut,” terang iya.

Lebuhka berandau ku Novert, bisi ati temegah meda pengeran bala nembiak ngiri penemu ba pengawa kulinari tu lalu udah sedarka pemesai guna pelajar ba pengidup.

“Bisi mega ati sinu mendingka sebana bala sida ti napi mayuh penanggul enggau penekul lebuh deka belajar ketegal nadai arus penyambung.

“Ngena peluang tu mega, aku ngarika kolej kami meri besai terima kasih ngagai kerejasama rat apai indai enggau bala nembiak ti udah ngelempaika pengandal ngagai kami ngubah nasip sida nengah pelajar pengelandik,” ku Novert madah nyemetak.