Kunchi nyadi pengarang berita profesional

LEBUH bejalaika pengawa nyadi pengarang berita ukai maya endur ngiga kaban, pia mega ukai ngiga munsuh tang ngiga berita.

Nya kebuah, pengarang berita ti dikangau ngulu sesebengkah program tauka pengerami, sida chukup dibasa laban bejalaika tanggungpengawa meretika pekara ti deka dikarang enggau ari sapa ti mansutka penerang.

Nama pekara ti patut dikarang? Enti iya nerangka pasal juluk, kebuah tauka chara nyapai pemujur nya tau dikumbai iklan. Enti deka meda sesebengkah karang manah, pilih mih pekara ti ulih narit ati pemacha lalu meseti bisi ngundan kualiti berita.

Kenu ku siku orang ke ngempu surat kabar Washington Post, Katharine Graham kala nyebut nyadi pengarang berita kitai enda tau kelalu mayuh niat. Seliah diri ari beambi ulih tauka semina ngambi penerang ari orang kedua (orang tengah).

“Makin pandak genteran karang, makin manah pendiau berita nya ari ke digerini.”

Pekara pugu dikena nyadi siku pengarang berita ti manah enda tau enda rindu macha. Anang enda nguji nulis ‘feature’ abis nadai dua kali seminggu.

Berita ukai semina pasal pengerami, tang mega nyerungkai cherita rayat ti enda dikelala.

Pengarang berita endang pengawa raban orang ti kreatif.

Enda salah sekali dua nguji ngena leka jaku dalam enggau sekeda leka jaku baru. Nya mih ti ulih ngasuh berita ti dikarang enda ngasuh leju.

Anang semina ngerunding deka dipuji nyadi pemberita ti landik laban pengawa pemberita patut nulis jaku bekarung, jaku injau, jaku akademik enggau ke bukai.

Lebuh pemberita rindu nyelitka leka jaku akademik ba genteran berita, enda salah nguji ngarang bup pasal pelajar tauka malin laban nya mih entara juluk ati siku pemberita profesional.

Udah nya, makin jarang penberita nulis isu ti sebaka nya ti manah agi.

Majak berani orang ti meri penatai berita nusika penerang diri, nyadi asil berita ke dikarang nya tentu enda ulih dikumbai petenah tauka bula.

Pengarang berita meseti bisi prinsip. Reti prinsip nya ulah pendiau ke profesional. Ukai semina ba karang ke ditempa, pemberita mega meseti ngayanka pendiau diri ti menuku, ambika banding anang mih bangat ngena selipar lebuh dikangau ngaga berita ungkup pengerami besai ti beradat.

Asil karang ke ditulis meseti dipeda idup. “Sangkuh PKR diatu nyau majak tumpul – munyi nya mih genteran gerini jaku pemberita ti idup baka munyi sada timang bala lemambang. Pendiau karang ti baka tu dituju khas enggau bisi reti ti dalam.

Anang sesekali niru berita ari pengarang berita bukai, tauka niru berita ke udah pansut. Mayuh pengarang berita tukang tiru. Nya kebuah asil karang nya dipeda mati.

Belajar mih nyadi pengarang berita ti tulen. Berita lebih manah enti disereta enggau gambar. Taja tanggungpengawa pengarang berita endang nulis, tang anang lembau ngambi gambar. Kebuah pia, ari siti gambar tentu ngundan seribu reti tauka cherita.

Gambar jurnalistik ti manah ukai semina fokus ngundan chura ke terang. Tang pekara ke pemadu beguna, gambar nya bisi nerangka sesebengkah pekara.

Tanggungpengawa pengarang berita mega madah ngagai mensia mayuh pekara ke nyadi. Nya kebuah, maya nulis anang sesekali beguai ngakim tauka nuduh orang salah.

Pemberita profesional mega patut ngena leka jaku ti alus. Lebuh nulis penerang ari orang ti mejah tau seliahka ngena jaku kasar. Manah agi dipeda nadai penemu ba mata pemeri berita ari ke dikutuk bala pemacha. Senjata tajam siku pengarang berita iya nya betanya.