SIBU: Gerempung Kuntau Sibu (PKS) meda maya hari tu mayuh nembiak rebak baru bisi pengerindu nampung main asal Iban ke dikumbai Kuntau.
Chairman PKS Guro Dennis Tan madah tu nyengkaum penyampau nembiak ke majak nambah ngulu pengawa belajar bekuntau.
“Nya alai, ba PKS, kitai deka ransing agi ngajar nembiak bekuntau,” pia ku iya nerang maya Aum Dua Taun Sekali PKS di sebuah hotel ditu, apin lama ke udah.
Kelimpah ari nya, Dennis mega madah, diatu PKS bela udah numbuhka Biro Main Asal enggau Biro Pengintu Pengelantang.
“Penumbuh dua iti biro tu deka ngemuntangka agi pengawa bejalaika tuju penumbuh PKS sebedau tu,” ku iya madah baru.
Maya aum nya mega, Sekretari PKS Edwin Maring madahka PKS deka ngatur randau begulai enggau bala guro kuntau di sitak tu ba tuju besaup ngangkatka agi main asal bekuntau.
Iya madah, pemutus nya digaga sida bepun ari PKR deka berengkah nambahka agi pengawa ngajar kuntau belabuh ari taun tu.
PKS merambu deka ngatur pengawa bejadi gerempung sida dalam kandang taun tu.
PKS udah ditumbuhka ari bulan Februari 2017 suba sereta udah dikemendarka Opis Pengerijister Gerempung (ROS).
“Taun tu, kitai merambu deka bejadi PKS sepengudah ke ditumbuh ari taun 2017 suba,” ku iya.
Taja pia ku Edwin madah, sebedau nya gerempung sida deka berandau silik dulu enggau bala guro ti mega nyadi raban dalam PKS.
Ba aum PKS lemai nya, raban PKS udah besetujuka Dennis mengkang megai pengawa nyadi chairman gerempung sida ungkup taun 2019-2021.
Iya udah megai penuduk nya ungkup taun 2017-2019.
Tu ditangkanka komiti bukai ti bela dikeandal nandu pengawa sida dalam gerempung.
Sida tu iya nya Guro Nyawai Limbie agi megai pengawa Sapit Chairman ditangkan Guro Edwin Maring nyadi Sekretari enggau Guro David Kujong nyadi Sapit Sekretari.
Kelimpah ari nya, pengawa Tukang Wang agi dipegai Guro Lee Laja ti dibantu Guro Micholas Lembang nyadi sapit iya.
Aum tu mega milih bala guro bukai nyadi raban exco baka Jemat Unggap, Hillary Joneka, Labang Jumbau, Bonnie Kupon, Leslie Lindang, Inggit Lindang, TR Sintau Misi, Roger Selan Tambi, Philip Beji enggau Donny Sangkap.
