ANANG menyati penyayau enggau pengelurus ati orang ti beamat-amat sayau ke nuan ketegal orang bukai.

Nya meh jaku lalau ari siku penanyi sigat, Tuan Bil tauka Bana Impi Laga ngagai sida ti benung nanggam pengerindu enggau jadi melaki bini.

Jaku lalau nya disadaka iya nengah lagu Kedai Pengerindu ti mujur dikeluarka nengah YouTube Twin Tone Production (TTP) kena 19 Januari tu tadi.

Urung dua minggu udah dikeluarka, lagu nya mujur dipeda ba penyuah urung 6,000 kali enggau nerima kelai like urung 200 iti ari peminat lagu Dayak.

ANCHUR
Ngelansa pasal lagu Kedai Pengerindu nya, Tuan Bil madah, lagu nya ngenang pengasa enggau pengelebu ati siku lelaki.

Ku iya, lelaki nya balat asa laban enda nyangka sulu ati ti pemadu dikesayauka iya kempang amat beduan enggau ngayahka pengerindu tuchi iya.

“Aku ulih nyelam pengasai ati lelaki dalam lagu tu ti balat asa, anchur, sinu enggau nadai daya agi laban enda nyangka pengerindu ti balat diasika iya ngelama tu, diatu nyau kusi.

“Kempang amat ati indu nya beduan lelaki ti beamat-amat sayau ke iya, nerima semua pengurang penimpang iya sereta sanggup begulai merinsa senang enggau iya.

“Ketegal pengamu mata enggau alah diumbuk penguji, indu nya bemain kayu tiga enggau lelaki bukai di belakang sulu ati iya.

“Pedis! Anchur! Tu siti penerang amat ti chukup pedis diterima lelaki nya laban enda nyangka sulu ti pemadu dipechaya enggau dikesayauka iya kempang berulah baka nya.

“Ati iya balat anchur asai ti ditanchum pisu ti ninggal litan ti dalam, asai ditepan batu besai ngasuh dada sendat nerima diri balat dikeduan baka nya.

“Tentu lelaki nya betanya-tanya nama penyalah iya nyentuk indu nya kempang amat ngaga iya baka nya.

“Aku pechaya nadai siku kitai ti nanggam pengerindu deka meda pengerindu diri jelungan di tengah jalai.

“Sigi diajih, disampi enggau dipinta kaul entara dua ati tu mujur nyentuk datai di penyangkai sereta begulai lantang nyentuk ke tuai,” terang Tuan Bil seraya meretika pengasai ati lelaki dalam lagu nya.

ANANG AMU
Berebak enggau nya, bujang Roban nya ngelalau, nyema nuan udah tetemuka orang ti lurus ati enggau beamat-amat sayau ke nuan, jaga iya enggau manah, pegai teguh enggai ke tebeleka.

Iya madah, nyema nuan enda nemu masa orang ti beamat-amat sayau ke nuan, dia nuan deka rugi besai laban udah muai batu intan ti berega ketegal deka ngulihka kerimpak kacha.

Tampung iya, ba dunya injau tu, nadai siti kedai bisi nyual pengerindu, ukai baka ti nyual gula batu, abis siti lalu beli siti da di kedai, ukai…pengerindu ukai baka nya.

“Nyema nuan udah dipenyati, dikeduan enggau dikeenggai dalam pengerindu baka lelaki nya tadi, ngetu mih naruh pengandal.

“Pajak ke singkang ngiga pengelantang nuan empu, badu ngenang pekara ti udah, ketik ke tisi orang ti enda nemu ngaku enggau masa nuan.

“Pengidup nuan berega lalu enda patut dibasau pia aja ketegal orang ti semina nemu ngayahka nuan,” ku lalau iya baru.

Ku Tuan Bil madah, lagu nya nadai ga tentu nyengala mangka pengidup iya tang tebal agi kisah dalam lagu nya ngenang peneleba ti kala nyadi ba pengidup orang ti ngelingi kitai.

TIMBAL MANAH

Anak tuai ari lima iku diri menyadi nya madah, lagu nya tau dikumbai ngembuan penyelai kediri empu.

Kebuah pia, ku iya, laban lagu nya ngundan pesan penyinu enggau semak ba ati bala peninga.

“Sekumbang lagu tu mujur dikeluarka nengah pelasar YouTube, aku mayuh nerima timbal manah ari mensia mayuh ti rindu ke lagu tu.

“Tebal agi sida tetarit ati enggau lagu tu ketegal kisah dalam lagu tu ti bisi mangka pengidup sida tauka orang bukai ngelingi sida.

“Taja pia, ba aku empu, tusun atur muzik ungkup lagu tu chukup narit ati.

“Lebuh nyadaka lagu Kedai Pengerindu tu, sekeda genteran leka lagu tu baka ‘…Anang ngiga mina maya rindu, anang nempa ti maya leju…’ ngundan siti pengasai sinu,” ku Tuan Bil.

PEJALAI MERINDANG

Baka bala artis bukai, pejalai Tuan Bil ba dunya pemerindang Dayak tu endang bepun ari pekit belagu ti diatur di selampur Sarawak.

Pengudah masuk mayuh pekit belagu, iya muka singkang berani ngaul Jamison Music Production (JMP) ti betuai ke Joseph Clem ba taun 2016.

Taja pia, ba baruh JMP, iya nadai ngeluarka sebarang lagu lalu ngujungka iua ngaga pemutus matak diri ari serikat nya lalu ngujika nasip begulai enggau W&E Entertainment ba taun 2018 nyentuk 2022 ungkup projek kediri.

“Ba pun taun 2023, aku berengkah ngiga siti penyangkai ti engkeman agi ungkup aku lalu ngujungka aku begulai enggau raban TTP.

“Sida nerima manah penatai aku nyadi siku kaban ruang bilik TTP ti diluanka Pengajar Allen Nyuntai.

“Nengah iring Pengajar Allen enggau Indra Siping, aku belajar mayuh pekara bekaul pengawa belagu.

“Seduai mih ti enda leju ngembing enggau ngelalau aku ba pengawa tu sereta meri aku peluang mantaika pengelandik diri belagu.

“Indra Siping mayuh ngajar aku pasal teknik vokal lalu raban TTP mega kemerah enggau chukup meri kerejasama enggau sukung tegut ba pengawa ngeluarka lagu,” ku iya mantaika pengaga diri.

Ungkup penerang, minat Tuan Bil ba pengawa belagu tu endang dikembuan iya kenyau ari sekula suba nyentuk nyadi kaban gerempung koir sekula sida.

Sekumbang mekuh dunya pemerindang, iya mujur ngeluarka enam iti lagu lalu empat iti ba baruh perabung W&E Entertainment enggau dua iti ba baruh perabung TTP.

Entara lagu ti mujur dikeluarka iya nengah W&E Entertainment iya nya Milih Isan Indai Aku, Begawai Di Nengeri Aja, Nadai Berami Gawai enggau Nadai Salah Bebuti.

Udah nya, iya ngeluarka lagu Dara Roban lalu pemadu baru iya nya Kedai Pengerindu begulai enggau TTP.

Laban ti minat belagu, dia iya suah masuk mayuh pekit belagu baka Pekit Belagu Sibu Base Jump, Sarawak Idol, Pekit Belagu PPWS Pampang Sarikei, Pekit Belagu SK Bukit Nibong, Sarikei enggau Pekit Belagu Ruai Kitai Pub Sarikei.

Ti bendar, mayuh pekit belagu ti bukai ti kala dipasuk iya kelimpah suah bulih lumur ba pekit nya.

KENANG MANIS

Sekumbang mekuh pengawa merindang, mayuh kenang manis kala diasaika artis beumur 30 taun tu.

Iya madah, siti ari nya lebuh merindang mensia mayuh kelebih agi bala peminat ba atas panggau taja pen nya bekunsi panggau enggau bala bakih sama artis.

Taja pen apin dikangau merindang kediri di sebarang palan pemerindang, ku iya, tang bekunsi panggau begulai enggau artis bukai nya chukup bereti ba iya.

“Tu meri pengasai ti nyelai, pengagit, pengeransing enggau besai reti ba aku kelimpah ulih belajar mayuh pekara baru bekaul chara nguasa panggau enggau merindang.

“Naka diatu, aku apin napi peneleba pait ba pengawa tu tang enti bisi pen nya semina disimpan aku kediri dikena ngajar aku nyingkang jauh agi ba pengawa tu,” ku iya.

Taja pia, ku iya, narit ati bala peninga ukai pekara ti muntang dikereja tang tu beguna amat dikena nentu lagu enggau nama kitai lekat ba ati sida.

“Nya alai, pengawa milih leka lagu, tiun enggau pejuluk lagu bela nyungkak ngagai pekara tu lalu pemadu beguna iya nya kualiti vokal siku-siku artis.

“Ba pekara tu, aku chakah ngansah vokal aku nengah pengawa masuk kelas vokal begulai enggau Noor Khan ari Kaunsil Seni Sarawak (MSS),” ku iya.

Tuan Bil madah, entara artis lokal ti nyadi inspirasyen ngagai iya baka Rickie Andrewson enggau Lucy M.

Terang iya, seduai ngembuan petah nyawa ti chukup lunak didinga, ngembuan personaliti kediri empu ba pengawa merindang sereta chukup semak ngaul bala peminat.

“Tu mih ti ngasuh seduai ngembuan mayuh peminat enggau dikerindu ke sida lalu lagu seduai pen mayuh lekat ba ati peminat seduai.

“Nya alai, seduai mih nyadi pun inspirasyen aku ba pengawa tu sereta berengkah nengkebang leka lagu kediri empu,” ku tusui Tuan Bil.

TERUS MAJU

Seraya bekunsika juluk diri dudi hari, bujang Roban nya ngarapka lagu iya majak lekat ba ati bala peminat enggau besemaya deka ngeluar mayuh agi lagu.

Iya mega ngarap industri muzik Dayak maju baka industri muzik menua luar enggau dikerindu mensia mayuh di luar Sarawak.

Ku iya, enti dibanding 10 taun ti udah, diatu industri muzik lokal majak nyingkang ke mua enggau napi ubah besai berebak enggau pemansang teknologi digital kemaya hari.

Nangkan nya, iya beterima kasih ngagai semua orang ti enda leju nyukung pejalai iya nyadi siku artis lokal kelebih agi sida sebilik, kaban belayan, bala bakih enggau peminat.

Pia mega, iya bela beterima kasih ngagai bakih sama industri ti mayuh mantu, nyukung, ngembing enggau ngerandang jalai ngagai iya mekuh pengawa nya.

Nya alai, iya ngarap sida terus meri sukung tegut enggau besampika pejalai iya mekuh dunya pemerindang nya.

“Aku deka nyadi sebagi ari industri tu lalu aram mih kitai begulai nyukung enggau ngerichahka agi dunya pemerindang Dayak tu,” ku iya.

MAYUH PENGELANDIK

Kelimpah landik belagu, nengkebang leka lagu enggau nyadi komposer, Tuan Bil mega ngembuan pengelandik ba pengawa nyadi tukang kangau tauka emcee.

Berebak enggau nya, iya bisi ngembuan setipikit ngaku ari SCOPE nyadi tukang kangau ungkup bemacham pengerami baka pengerami melah pinang, hari pengada, pengawa beterang enggau ti bukai.

“Sapa-sapa ti deka begunaka servis aku nyadi tukang kangau, aku seruran bisi awak ungkup kita lalu kita patut madah ngagai aku tumu ngambi aku ulih ngatur awak diri.

“Bayar ungkup servis tu bepanggai ba penyauh endur ti patut dilawa enggau bansa servis ti diguna.

“Enti deka nemu silik pasal servis tu, kita patut ngelawa Facebook page aku: Tuan Bil,” ku terang iya.

Nya alai, nuju mensia mayuh ti deka begunaka servis tukang kangau, kita diperansang ngiga Tuan Bil ungkup ngerichahka program kita.