LAGU dianti semua nyerumba Pengerami Gawai diberi nama Ku Ka Gawai disadaka Ramles Walter ngasuh kitai begau sereta teperindang ninga lagu baru nya.

Bujang sigat asal ari Kapit nya madah, ba Pengerami Gawai sekali tu, iya mai konsep bebida ari taun ke udah.

“Taun tu, aku ngaga konsep elemen muzik lagu Aram Begawai lalu dipegulai enggau lagu Richah Gawai.

“Kami ngadu muzik lagu tu semina sehari aja lalu taun tu mega, aku bekerejasama baru enggau Maxis.

“Temegah endar projek muzik video tu udah mujur enggau nyadi nyata.

“Gaga mega asai ati laban udah bekerejasama baru kedua kali enggau raban Maxis ti udah nyukung ngasilka lagu Gawai.

“Asil video ti digaga mega chukup manah sereta moden. Terima kasih nuju semua ti udah ngemujur muzik video Ku Ka Gawai tu.

“Ngena peluang tu mega, meri terima kasih ngagai semua ti udah nyukung enggau meri timbal ti chukup manah ba pejalai seni aku ngelama tu.

“Semua sadang penemu nya endang diterima aku ngambi ulih nengkebang lagu ti manah agi ungkup bala peminat,” terang iya.

Ramles mega madah, sukung tegut ari bala peminat, sida sebilik, bala bakih enggau bala bukai besai bendar reti ngambi terus engkeman ba industri muzik kitai Dayak.

Ba lansa sebaka, Suara Sarawak mega bisi minta penemu personaliti TVS, Priscilla John ti udah begulai ngemujur muzik video lagu Ku Ka Gawai.

Ku Priscilla, kenang iya ba muzik video Ku Ka Gawai tu iya nya ulih begulai enggau raban Maxis ti ngembuan mayuh peneleba ngasilka siti video Gawai.

“Dalam video tu, siti ari utai ti dipuji aku iya nya Ramles Walter siku penanyi ti chukup biak dalam industri.

“Iya mega chukup landik ngasilka lagu kelebih agi lagu Gawai.

“Bujang sigat ari Kapit tu mega chukup manah, disiplin enggau tumu datai ari jam ke udah ditetap.

“Ba aku, Ramles ulih pegi jauh ba industri muzik di menua kitai tu.

“Siti agi, kitai di menua Sarawak tu ngembuan pupu raban bansa.

“Lebuh ngasilka MV tu, kami bisi mayuh pupu raban bansa ke begulai enggau kami ngasilka muzik video tu,” ku iya.