SIBU: Lapan begunan kedai ti tekerap ba Jalai Pahlawan empai lama ditemu di Jalai Pahlawan empai lama ditemu enda likun endur diau bepelasarka pengawa nyerenih teknikal pemadu baru ari raban bekuasa.
Ku Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee, pengawa meresa tumu ti dipejalai Opis Kereja Raya Malaysia (JKR) kena 19 Februari tu tadi tetemu ke struktur begunan nunjukka begunan nya majak tekerap nyengkaum ba jalai sereta tanah.
Ku iya, semua komponen besai struktur udah dikelai ba tikas ‘mirah’ kelai risiko pengelikun.
“Perabung, dinding enggau geladak, semua nya ba tikas ngirauka ati.
Nya kebuah, beguna tu endang enda likun agi,” ku iya pengudah betuai ke aum ngenyit kedua bekaul penusah nya, lemai Hari Satu tu tadi.
Aum nya ngaul mayuh ejensi nyengkaum Kaunsil Mengeri Sibu (MPS), Opis Bomba enggau Penyah Penusah Malaysia (JBPM), Polis DiRaja Malaysia (PDRM), Raban Penyangga Orang Periman Malaysia (APM), Opis Residen Sibu, Opis Pelilih Sibu sereta sekeda ejensi utiliti enggau pengempu kedai nya.
Ba randau nya, Michael Tiang madah, isu ti dibantai pengempu kedai iya nya deka tama baru ngagai begunan nya dikena nyelamat barang berega.
“Sebedau tu, raban bekuasa berati ke perambu numbuh siti ‘protokol ngempu’ enggau neritka atur matau pengelikun.
“Taja pia, pengudah berati ke atur teknikal kelebih agi ari raban bomba enggau polis, perambu nya ditangguh berindik ari risiko tekerap enggau faktor pengelikun mensia mayuh,” ku iya.
Michael Tiang ti mega Kaban Kunsil Nengeri (ADUN) Pelawan madah, MPS deka nyiri injinir struktur ngambi bejalaika pansik silik ngambi ngelala kebuah penanggul struktur enggau berati ke risiko nya.
Iya mega enda ngenggaika begunan nya meseti direrak nyema ripot teknikal ngenuku nya majak ngeruga pengelikun.
Pia mega, iya madah ke pegawai ari Opis Geosains Sarawak ditaga kia kena 27 Februari ngambi berati ke utai dalam tanah ngena scanner khas.
Berebak enggau nya, iya ngelalau semua raban ngambi enda nempa peragam tauka tuduh enda patut tang meri awak bejalaika pansik profesional nentuka pengelikun mensia mayuh terus dijaga.
Bela datai, Chairman MPS, Kaunsilor Clarence Ting Ing Hor.
