MANIS, lantang, gaga, gagit, ransing, dikeibuh, dikesayau enggau dikerindu. Nya meh pengasai ti diasaika kitai lebuh benung nanggam pengerindu.

Semua utai tak asai manis magang enti pengerindu benung bebungai ngerembai enda nyalah dunya tu asai ke tua aja ngempu.

Tinduk malam pen nemu meh tuchum lelegup. Tak enda berasai nemu ketawa kediri lebuh benung ngereja pengawa diumba bai kelalu gidan ngenang sulu ati.

Baka nya meh gaya orang ti benung mabuk pengerindu lalu pechaya meh genap kitai kala ngasai peneleba sebaka nyengkaum Lenionrechee Usin.

DIGERAU MIMPI RAWAN
Tang diatu udah berubah 180 darjah. Semua nya semina tinggal kenang ngerau nyadi igau mimpi rawan, balat ngerachun tangkai ati pemadu dalam.

Taja pen dipeda tuchum manis enggau ketawa gaga tang semina Petara aja nemu penganchur ati Lenion.

Penyayau enggau pengerindu tuchi ditanggam iya ngelama tu ditempaya pia aja, dikesai enda diguna sereta dipenyati nadai daya.

Ba sukut ati pemadu dalam, Lenion semampai nyerauh nanya nama penyalah enggau pengilap udah digaga iya?

Nama kebuah sulu ti semampai ditimang enggau diandai iya ngelama tu kempang amat ngelebu ninggalka iya kediri aja nadai temu berita?

SEBANA DALAM LAGU
Semua pengasai, sabak enggau sebana ati diri nya dibantai Lenion nengah lagu Joget Keranjai Manuk.

Lagu ti ditengkebang iya empu nya mujur dikeluarka kena 15 Ogos tu tadi ba pelasar YouTube JL Sound Studio.

Naka diatu, lagu nya mujur dipeda lebih 100,000 orang enggau nerima kelai like lebih 1,000 ari mensia mayuh.

Seraya mulaika kenang, Lenion madah, lagu nya ngenang pengerindu ti ditanggam iya enggau siku indu ti mujur muka pintu ati iya.

Ngelama tu, ku iya, seduai begulai chukup manah nadai kala besengki seleka jaku, besaup nenun bungai pengerindu, meransang nyukung mandung pangan diri sereta bekunsika juluk ati deka idup semati nyentuk danjan pegi sulai ke Batang Mandai.

“Tang sayau seribu penyayau, nama daya aku asi, sigi enda disagi pengerindu tua lesi nengali hari.

“Sekelip mata pen aku agi enda pechaya, nuan dara kempang ninggalka aku kediri tekapa-kapa dalam pemetang nadai achuk mata.

“Petang dunya aku asi ditinggalka nuan enda bepadah nadai kebuah. Nuan pegi ngenyit nadai ngirum berita,” ku Lenion nusui sebana diri.

Ukai semina asa ditinggal nadai kebuah, ati Lenion chukup anchur luluh lebuh ninga orang pemadu dikesayauka iya udah belaki jadi enggau lelaki bukai.

“Bisi sekali, aku nerima berita dibai angin bepuput lundai madahka nuan udah belaki. Anchur! Chukup anchur ati aku ninga berita nya.

“Ninting hari ati aku nyabak, nyerauh nanya nama penyalah, pengilap enggau pengurang diri. Nama pekara nyeruga sulu ngasuh kempang menyati pengerindu tua?” ku tampung iya baru.

Seraya ngelap ati mata ti neritik naya, iya madah, nyangka nya udah selatan diatur Petara lalu naka ulih meh iya nerima taja chukup pait ditelan.

Ku iya, terima kasih meh sulu taja enda panjai begulai, terima kasih ke pemanah nuan udah sangkai singgah enda lama ba pengidup iya ngelama tu.

Nuju bala peminat, diatu penanyi sigat tu udah idup lantang begulai enggau bini anak ti dikesayau iya.

“Cherita dalam lagu nya semina pengingat lama aja sereta nyadi buah kenang. Aku pechaya mayuh orang ngasai peneleba sebaka.

“Diatu aku udah lantang begulai enggau bini dikesayau aku ti chukup mentas sereta siru.

“Aku semina sayauka nuan siku aja lalu naka ulih nyadi laki enggau apai ti menyana ngagai anak tua.

“Terima kasih udah ngemparu enggau ngintu ruang bilik tua ngelama tu. Terima kasih mega udah nerima pengurang penimpang aku,” ku apai anak empat nya.

Nangkan nya, iya ngelalau mensia mayuh sekali ke nya benung nanggam pengerindu tauka udah jadi melaki bini ngambi nyaga pengerindu tuchi enggau manah lalu anang menyati pangan diri.

“Kelala manah ati budi pangan diri, nyema udah enda sepenemu, beserara meh ngena chara ti manah sereta beradat,” ku iya nyemetak.

UDAH SELATAN MERINDANG
Ungkup rikod, setaun lebih udah ngaul industri muzik Dayak, penanyi ti datai ari Kampung Kepayang, Simunjan nya mujur ngeluarka tujuh lagu single diri.

Nya nyengkaum lagu Meruan Nganti, Bungai Merejas, Joget CCTV, Sulu Mungkir Danji, Alu Empai Jadi, Enggai Ngiga Pemedis sereta Joget Keranjai Manuk.

Diatu iya benung chakah ngeluarka lagu pemadu baru diri ti deka dikeluarka enda lama agi sereta ngelalau bala peminat liat ati nganti lagu pejuluk Enda Sanggup Jauh Nuan nya.

Minat iya ba pengawa belagu nya endang dikembuan iya ari mit kenyau ari umur lima taun suba lalu nya udah nyadi sebagi ari pengidup iya.

Ngelansa senentang pejalai iya ba dunya pemerindang tu, semua nya bepun ba sebengkah pengerami melah pinang.

Ba pengerami nya, Lenion diberi basa merindang bala temuai ti ngulu pengerami melah pinang nya.

Pemanah sada nyawa iya maya merindang nya mujur narit ati dua komposer tebilang ari IA Sound Studio, Anthony enggau Ayien Bayang ti bela ngulu pengerami nya.

Seduai madahka diri tekait ati ninga pemanah sada Lenion lalu meri peluang ngagai iya ngerikod enggau ngeluarka lagu ba baruh perabung sida.

Peluang berega nya enda nyalah baka orang ti benung ngantuk disurungka panggal laban iya udah lama meram juluk deka ngerikod enggau ngeluarka lagu diri.

Nya meh pun pejalai iya nyingkang ba industri muzik Dayak nyentuk sehari tu sereta chakah ngeluarka lagu diri empu.

“Aku chukup berutang budi ngagai seduai. Nya alai, ngena peluang tu aku meri besai terima kasih ngagai seduai laban udah ngerandang jalai ngagai aku ngamatka juluk diri.

“Pemanah seduai tetap aku kenang nyentuk jemah ila lalu sama meh kitai ngerichahka industri muzik kitai,” ku iya seraya enda ngetu nyebut terima kasih.

MINAT DIPARIT APAI
Labang apai, labang anak. Nya sempama ti engkeman dikena nusui minat Lenion ba pengawa belagu laban nitih ke singkang apai iya.

Ku iya, apai minat amat belagu lalu suah merindang sida serumah lebuh bisi pengerami ba rumah panjai sida.

“Minat aku ba pengawa belagu endang diparit apai lalu diatu aku mujur nitih singkang iya.

“Siti aja bida entara kami duai iya nya apai nadai ngerikod lagu tang aku bisi peluang ngerikod enggau ngeluar lagu diri empu.

“Nyangka jeman sida suba pedis deka ngerikod lagu enda baka kemaya hari tu. Nya meh ngasuh aku ransing agi deka ngerikod enggau ngeluarka lagu diri ngambi ulih ngemegahka apai lalu nerus legasi iya,” tusui Lenion.

Lebuh manggai umur lima taun, Lenion endang udah ngembuan pengerindu ba pengawa belagu.

Ba umur ti agi biak bendar nya, iya endang udah ngaul raban live band ba rumah panjai sida sereta udah ngelala senentang tempo, korus enggau ngingatka leka lagu.

Iya mega suah bemain gita enggau karaoke lebuh bisi maya lepa kelimpah suah masuk bemacham pekit belagu ti diatur raban sekula tauka program luar.

NUMBUHKA STUDIO
Lebuh dirandau senentang perambu enggau juluk dudi hari, penanyi beumur 36 taun nya madahka diri deka numbuhka studio enggau muka channel kediri empu.

Iya madah, sebedau tu, iya endang udah lama meram juluk deka nyadi siku penanyi enggau penengkebang lagu.

“Puji Tuhan laban diatu juluk nya udah dikeamat. Taja pia, siti agi juluk besai aku iya nya deka numbuhka studio kediri empu.

“Aku besampi ngarap juluk besai tu ulih dikeamat dudi hari laban aku deka nempa mayuh penanyi baru bepenau dikena ngerichahka agi industri muzik kitai,” ku tusui iya.

Ukai naka nya aja, iya mega madahka diri ransing deka ngeluarka mayuh lagu baru diri dudi hari sereta diterima manah mensia mayuh.

Nya alai, ku iya, sampal meh kitai besampi ngambi juluk nya ulih nyadi nyata.

“Diatu muzik kitai majak dikelala semua orang ukai semina bansa Dayak aja lalu ngarap majak ngerembai dudi hari,” ku iya.

Dikena ngujung ke randau diri, Lenion ti rindu ke pengawa main bol beterima kasih ngagai semua orang ti semampai nyukung iya ba pengawa merindang.

Kelebih agi, ku iya, bala peminat, bakih, kaban belayan enggau sida sebilik ti enda leju nyukung minat enggau pengawa iya merindang.

“Sukung ari kita semua besai bendar reti ba aku. Enti nadai sukung ari kita semua, sapa meh aku?

“Ketegal kita meh, nama Lenionrechee meruan pegari ba industri muzik Dayak nyentuk sehari tu.

“Anti meh lagu baru ari aku laban aku seruran deka ngeluarka mayuh lagu dudi hari dikena merindang kita semua,” ku Lenion.

Iya mega minta ampun enti bisi pengilap, kelanjur jaku enggau jai ulah lebuh begulai. Ambi ke manah lalu buai ke jai.