Liga Malaysia taun tu dikinsil

KUCHING: Juluk deka meda sambung main bol Pekit Liga Malaysia (Liga M) taun tu tejanggal pengudah Gerempung Main Bol Malaysia (FAM) enggau Liga Bolasepak Malaysia (FML) dipinta piak Perintah Besai nginsil liga nya.

Menteri Kanan (Penyaga Menua), Datuk Seri Ismail Sabri Yaakob madah, sebarang pengawa begempuru nyengkaum bemain bol tetap enda dikemendar taja timpuh Atur Tagang Pejalai (PKP) diketu.

“Pekit main bol enda ulih diatur kediri enggau meseti bisi tim lalu enti sema dua tim bemain, udah tentu lebuh ari 22 iku bemain ba padang.

“Lumba tu ukai baka bemain badminton lebuh pemain enda betemu enggau pemain sepiak. Main bol engka bisi betegu enggau pangan diri,” ku iya ba aum pemberita bekaul atur PKP nya, ditu kemari.

Terang Ismail, nitihka Prosedur Operasyen Standard (SOP), piak opis menteri enda tau ngemendarka pekit main bol diatur taja pengudah PKP.

Nangkan nya, Ismail madahka sekeda SOP baru deka dibantai pengudah timpuh PKP abis.

“Enti sema PKP diketu sehari tu, pagila enda bereti rayat ulih mindah ke bukai baka sebedau tu tang udah tentu, bisi SOP agi deka dibantaika kami enggau patut dititih semua kitai.

“Ambika banding, begempuru bebala mayuh enda dikemendar enggau atur nya mengkang dipejalai pengudah PKP abis,” ku iya.

Kelimpah ari nya, Ismail madahka naka diatu kitai agi ngena SOP ke bisi lalu piak Kaunsil Pengelikun Menua (MKN) benung nyendiaka SOP baru pengudah abis PKP,” terang iya silik agi.