KUCHING: Lot tanah enggi Perintah Besai ti diserah baru ngagai Perintah Sarawak deka dikemansang ungkup pemaik rayat nengeri tu.
Premier Sarawak, Datuk Patinggi Tan Sri Abang Johari Tun Openg madah, Perintah Sarawak udah bisi langgur kediri empu ungkup lot tanah ti nadai dikemansang kenyau ari 20 nyentuk 30 taun ke udah.
Ku iya, perintah nengeri tu deka mulaika bayar penyampau pampas ngagai Perintah Besai bepelasarka rega asal tanah nya lebuh dibeli suba.
“Kebendar, kitai udah baum lalu di baruh Sempekat Malaysia 1963 (MA63), siti pekara ti dikerandau iya nya pekara pasal tanah ti nadai dikemansangka Perintah Besai.
“Nya alai kitai minta tanah nya dipulaika baru ngagai Sarawak lalu asil tanah nya ila deka diberi pulai lalu sekeda ke bukai agi benung diadu.
“Nambah ke nya, kitai endang udah bisi langgur mega baka enti sema tanah ungkup nirika sekula tang enda digaga ketegal takah sekual nya Semak enggau jalai besai.
“Dia kitai ngambi pulai tanah nya ungkup langgur projek pemansang di bagi menua diri empu,” terang iya.
Abang Johari mantaika pekara nya lebuh dirandau pemberita pengudah ngulu Pengawa Begempuru Ma’al Hijrah renggat Sarawak 1445H/2023M di Dewan Kompleks Islam Sarawak ditu tadi.
